Szily János: Instructio venerabilis cleri dioecesis Sabariensis (Szombathely, 1855)

Quare ut primariae nostrae huic obligationi satisfaciamus; in principio suscepti episcopatus vos dilectos in Christo Fratres, ac Filios, in sortem Domini vocatos, praesertim animarum regimini praefectos, omni studio monendos, et excitandos esse constituimus, quatenus ad optimam sanctae vocationis vestrae disciplinam vosmet conformantes, et vestram propriam , et vobis commissorum salutem certius operemini. Ad salutaria vero monita , et praecepta nostra mentibus vestris altius imprimenda, primum ea, quae ad personam, dein quae ad officium vestrum spectant, ex sacris literis, conciliis, SS. Patribus, receptisque Ecclesiae , et Patriae nostrae consvetudinibus ea ratione proferemus, ut vos quidem munus vestrum doceamus, una tamen ad hos s. doctrinae fontes consulendos exstimulemus. Audite itaque, dilecti in Christo Fratres ! et Filii! disciplinam Patris, ac Pastoris vestri, et quod hic audieritis, et legeritis, opere complete.