Circulares literae dioecesanae anno 1902 ad clerum archidioecesis strigoniensis a Claudio Francisco Cardinale Vaszary principe primate regni Hungariae et archiepiscopo dimissae
III.
Nr. 554. Jubilaeum summi pontificatus Leonis PP. XIII. — 13 — III. Augustissimus Pontifex Leo PP. XIJI., quem conservatrix vitae atque eventuum humanorum moderatrix Divina Providentia per laboriosam universae Ecclesiae sollicitudinem eo usque incolumi valetudine servavit, ut nedum sacerdotii, verum episcopatus etiam natalem quinquagesimum ante quatuordecim ac respective novem annos celebrare potuerit: propediem, quippe 20. Februarii curr. summa Dei Sospitatoris clementia secundante, annum a sua ad b. Petri cathedram exaltatione quintum supra vicesimum auspicabitur. Provectam hanc Beatissimi Patris aetatem et diuturnum pontificatus cursum aestimantes, tantamque mortalis aevi usuram non sine causa pignus veluti quoddam patrocinii coelestis interpretantes, non possumus, quin redundante gratiis animo, effusisque laetitiis exclamemus: „A Domino factum est istud, et est mirabile in oculis nostris.“ Mira sane Divinae Providentiae dignatio, a qua sola repetenda est longitudo dierum, qua Augustissimum Pontificem Leonem PP. XIII. nonagenario maiorem in b. Petri cathedra cernimus fulgentem, cuius praeclara facinora non homines tantum, verum saxa etiam loquuntur: nominis autem famam per universum orbem longe lateque propagatam, profuso velut clamore celebrant viri aetatis nostrae lectissimi atque universi rerum aequi et acerrimi aestimatores, iique ab Ecclesia etiam dissidentes. In Eminentissimorum Patrum Purpuratorum, S. R. E. Cardinalium conclavi, die 20. Februarii 1878. celebrato, mira suffragatorum concordia in virum fere septuagenarium conspirante ac Spiritu Sancto afflante, ad summi pontificatus fastigium evectus, vel ab ipso suae inaugurationis exordio, inexplebili tuendae ac provehendae religionis studio incensus pascit Dominicum Gregem in innocentia semper cordis sui ac nihil unquam habuit habetque antiquius, quam ut communi bono prospiceret, laboranti reipublicae sacrae et civili suppetias opportune ferret, malisque tot imminentibus mederetur. Nemo sane nostrum est unus, qui probe non noverit Beatissimi Patris nostri Leonis vigilantiam et sollertiam pro adimplendis omnibus muneris divinitus demandati partibus, cuius pontificiae sollicitudinis nedum praeclara testimonia, verum documenta quoque sunt aere perenniora Literae ipsae Apostolicae, sine numero perscriptae, quibus vir iustus, sapientia et virtutibus insignis, omnes orbis terrarum Cbristicolas, gentes et nationes universas, respective earum antistites et principes, hortatione per intervalla monere, consilio iuvare et assidue docere consuevit, ut omnibus omnia factus, 4
