Circulares litterae dioecesanae anno 1895. ad clerum archidioecesis strigoniensis a Claudio Francisco Cardinale Vaszary principe primate regni Hungariae et archiepiscopo dimissae

VI.

46

In Dioecesibus Bellimen, et Feltren. plures extant Ecclesiae ad Regulares Familias olim pertinentes, quae, iisdem Regularibus initio huius saeculi per civile Gubernium dispersis, Clero saeculari attributae sunt. Hasce in Ecclesias, ubi mos viget peragendi sacras Maioris Hebdomadae functiones, nonnullis abhinc annis, deficiente Sacerdotum numero, quaedam inductae sunt consuetudines, unde suborta sunt insequentia dubia:

Dub. I. An Passio Domini, deficientibus aliis ministris, cantari possit a Diacono ministrante quoad textum Evangélistáé, et a Celebrante quoad verba a Christo prolata; vel a duobus Diaconis, quorum alter sit ipse Diaconus ministrans; vel (si Subdiaconus ministrans sit in ordine diaconali) a duobus Missae ministris?

Dub. II. An Feria V in Coena Domini liceat Missam canere cum alterius Hostiae delatione ad Sacellum (vulgo Sepulcrum), quamvis die sequenti, ea in Ecclesia, Missa Praesanctificatorum non celebretur, eamdem Hostiam e Sepulcro in Sacrarium sub vesperam privatim deferendo? et quatenus Negative,

Dub. III. An liceat praedicta Feria V. Missam canere absque alterius Hostiae consecratione, et absque processione?

Dub. IV. Ubi vero nulla eadem Feria V habeatur functio, an possit sacra Pyxis in suo Altari servari usque ad solis occasum, ut fideles, loco Sepulcri, ad Ssmam Eucharistiam adorandam accedere valeant?

Dub. V. An pro Altarium denudatione sufficiat mappas, seu tobaleas, ita complicare ut maior mensae pars nudata remaneat, quum ipsae mappae ab Altaribus amoventur?

Dub. VI. In utraque Ecclesia Cathedrali, quibus diebus agitur Officium de aliquo Sancto in cuius honorem dicatum sit alterum ex Altaribus lateralibus, Missa Conventualis celebratur ad illud Altare, manentibus in Choro Canonicis aliisque Praebendatis. An haec consuetudo sit toleranda?

Et Sacra eadem Congregatio, ad relationem subscripti Secretarii, exquisito voto Commissionis liturgicae, ita propositis Dubiis rescribere rata est, videlicet:

Ad I. Affirmative.

Ad II. Negative.

Ad III. Affirmative iuxta Decretum Pii Papae VII (Resol. Dubior. 28 Junii 1821, appr. 31 Iulii eodem anno), de venia saltem Episcopi.

Ad IV. Affirmative.

Ad V. Serventur rubricae.

Ad VI. Affirmative; dummodo Altare nimis non distet a Choro; secus Missa celebretur in Altari Choráli, vel Chorus adscititius paretur ad Altare, ubi Missa Conventualis celebranda sit.

Atque ita rescripsit et servari mandavit die 1 Februarii 1895.

CAI. Card. ALOISI-MASELLA S. R. C. Praef.

(L. S.)

ALOISI TRIPEPI S. R. C. Secret.