Novák Ádám (szerk.): Fontes Memoriae Hungariae IV. Varsóban őrzött magyar vonatkozású oklevelek, 1490–1521 (Debrecen, 2022)
Oklevélszövegek
205 87. 1507. május 31. Buda. A Zsigmond lengyel király által küldött lengyel követek okle vele, melyben átírják és megerősítik a II. Ulászló magyar királlyal kötött szerződést. Ioannes Lubranski episcopus Poznaniensis, Stanislaus de Chodecz marscalcus regni Poloniae ac Leopoliensis, et Camenecensis capitaneus, Ioannes de Lassko praepositus Posnanienis, cancellarius eiusdem regni, et Christophorus de Schidlowyecz dapifer Cracoviensis curiaeque regiae Poloniae thezaurarius et capitaneus Siradiensis, serenissimi principis et domini, domini Sigismundi Dei gratia regis Poloniae, magniducis Lithvaniae, Russiae Prussiaeque domini et haeredis etc. domini nostri clementissimi oratores, per ipsius maiestatem ad serenissimum principem et dominum, dominum Wladislaum eadem gratia Hungariae, Bohemiae, Dalmatiae, Croatiae etc. regem, necnon Slesiae, et Lucemburgensem ducem marchionemque Moraviae et Lusaciae etc. dominum colendissimum, impraesentiarum destinati, universis quibus expedit notificamus. Quod cum omnis humanarum rerum et privata et publica actio iure quodam naturae in hunc finem dirigatur, ut hominibus prosit et eorum commodis serviat et opituletur, non immerito tamen primum sibi locum hac in parte vendicare videtur, quae publica appellatur, utpote quae auctoritate praestans et quadam quasi maiestate praedita, quicquid graviter et constanter aggreditur, non dubitat eo studio eaque fide prosequi, ut in processu strennua et in exitu magnifica et laudanda bonorum iudicio censeatur. Imprimis autem ea fuerit potissima et omni laude praedicanda, quae bonis regibus peculiari quadam vi naturae indita est, ut mortalium paci et otio prospiciat et suffragetur, ac demum inter eos diversis artibus amicitiam, fidem et amorem conciliet. Unde posthac omnium rerum, quae ad bene beateque vivendum attinent, copia facile suppeditari solet, hinc sacrarum rerum et religionis propagandae omnis cura et sollicitudo suboritur, frequentesque fumant felicibus arae, hinc etiam bonis et iustis rectoribus supra nominis immortalitatem, coelestis vitae praemium acquiri et promereri omnium sapientum sententia perhibetur, ut eos non immerito, qui ita rebus his publicis, quibus praefuerunt, saluti, commodis, pacique et otio consuluerunt, in deorum numerum consecrare non dubitaverit antiquitas. His itaque rebus praedictus serenissimus rex noster dominus Sigismundus persuasus, senatu regni sui non modo assentiente, verum etiam velut precum calcaria sponte currenti, ut dicitur, admovente, cum plena potestate et scripto mandato nos ad hanc sacram maiestatem fraternam Hungariae misit, qui ceteris regibus, qui pacis artibus populos sibi subiectos regere, quique effigiem iusti et legittimi imperii referre student, speculum praebet et exemplar, ut apud pos-
