Novák Ádám (szerk.): Fontes Memoriae Hungariae III. Varsóban őrzött magyar vonatkozású oklevelek, 1439–1489. Közreadja: Novák Ádám, Tóth Orsolya és Tóth Péter (Debrecen, 2019)
Oklevélszövegek - 118
118 61. 1440. június 29. Buda. Az ország rendjei eskü alatt erősítik meg I. Ulászló magyar királlyá választását és érvénytelenítik V. László megkoronázását. In nomine Domini. Amen. Ad perpetuam rei memoriam. Cum gesta hominum in huius labentis vitae stadio in mortem et oblivionem currentium literarum munimine soleant futurorum notitiae et memoriae conservari, proinde nos praelati, principes, barones, comites, milites, proceres, clientes, cives, totaque communitas regni Hungariae, universaliter singuli et singulariter universi tenore praesentium notum facimus, recognoscimus et fatemur universis et singulis tam praesentibus, quam futuris, quod serenissimo et bonae memoriae principe, domino Alberto, Romanorum et praefati Hungariae regni rege, domino nostro gratiosissimo tempore noviter transacto, prout Divinae placuit voluntati, viam universae carnis ingresso, considerantes, qualiter per obitum ipsius regnum nostrum praedictum vacaret et necessario sibi careret gubernatore et defensore, volentesque super huiusmodi casu opportune consulare, de bono et felici statu regni eiusdem providere et periculis, quae ex diutina vacatione ipsius possent evenire, in tempore obviare, instituta mox ob eam rem totius regni in civitate Budensi generali conventione, coepimus exacta diligentia, mutuis deliberationibus et consiliis nostris negotium hoc agere, modosque omnes et vias totis ingeniis nostris examinare, quibus de idoneo et tali rege saepedicto regno potuissemus prospicere et providere, per quem regnum ipsum in statu suo feliciter posset conservari, adaugeri et contra barbaras et sibi infestissimas nationes protegi et ab ipsorum crebris incursionibus Christi fideles respirare. Tandem post diutinas deliberationes, postque varios ad rem hanc habitos tractatus recensuimus, quod priscis temporibus, dum regna haec Hungariae et Poloniae sibi confinantia et commetanea in pace, concordia et amicitia speciali iuncta, colligata et unita fuerunt sive regum suorum sanguinis propinquitate, quemadmodum tradunt historiae tempore Sancti Ladislai regis fuisse, sive dominantis idemptitate, quod adhuc nonnulli aetatis nostrae homines diebus colendae memoriae Lodovici regis memorantur accidisse, qui utriusque regni gubernacula feliciter disponebat, multum id et per omnem modum utilitatis profectus et augmenti regnis istis attulerit, tum ex alternis incolarum suorum accessibus, assiduisque eorundem commerciis singulorum excrescebant commoda et suffragantibus sibi mutuo regnorum ipsorum contra hostes suos potentiis, laus, honor, gloria viguit et respublica ipsorum in immensum reflorebat, et ob hoc tali consideratione permoti, post eiusmodi deliberationes nostras accedente primum ad hoc illustrissimae principis dominae Elizabeth, reginae nostrae, praenominati domini Alberti consortis legittimae expressa voluntate, obtulit se prae omnibus aliis mentibus nostris persona excellentissimi principis domini Wladislai Dei gratia Poloniae regis moderni,
