Novák Ádám (szerk.): Fontes Memoriae Hungariae III. Varsóban őrzött magyar vonatkozású oklevelek, 1439–1489. Közreadja: Novák Ádám, Tóth Orsolya és Tóth Péter (Debrecen, 2019)
Oklevélszövegek - 119
119 domini nostri gratiosissimi, in quem demum vota omnium, qui in dicta Budensi et generali regni totius conventione fuerunt convenientes, affectantibus omnibus ipsum sibi et dicto regno Hungariae praefici in dominum et regem. Et statim, ut potiremur, votis ad conficiendum huiusmodi negotium misimus ad praesentiam praenominati domini regis solennes ambasiatores et nuntios nostros speciali et sufficienti auctoritate et mandato tam praefatae dominae Elizabeth reginae, quam nostra et regni totius fulcitos et de expressa mente et voluntate eiusdem ac nostra ad plenum instructos, certificatos et informatos, videlicet reverendum in Christo patrem dominum Johannem episcopum Segniensem et magnificos dominos Mathkonem de Thalloucz Dalmatiae, Croatiae et totius Sclavoniae regnorum banum, Johannem de Peren magistrum thavarnicorum regalium, Ladislaum de Palloucz curiae regalis magistrum ac Emericum de Marczali magistrum dapiferorum regalium et comitem Simigiensem. Ac hi huiusmodi mandato tum zelo boni communis regni saepedicti, tum etiam ad instantiam antedictae reginae et nostram suscepto profecti sunt, ad regemque praedictum in civitate Cracoviensi tunc constitutum venientes, exposita primum coram maiestate legatione iniuncta et demum exactis cum ipso domino rege, praelatisque, baronibus, proceribus et nobilibus regni Poloniae compluribus diebus in tractatibus ad rem eiusmodi opportunis negotium ipsis commissum tam sapienter, quam feliciter confecerunt et praememoratum serenissimum principem dominum Wladislaum in dominum et regem regni Hungariae et nostrum praemissa auctoritate et mandato, nomine regni eiusdem nominaverunt et elegerunt, expressis et enumeratis in ipsa electione omnibus et singulis conditionibus et modis, qui iuxta traditam ipsis formam exprimi debuerunt et signanter illis, per quos secundum voluntatem reginae praetactae et nostram collaudationem et consensum ipsi reginae et proli, quam tunc in utero gestabat ex ea sive in sexu masculino, sive faemineo generanda sufficienter extiterat provisum, omniaque huiusmodi electionis negotia post intimationem de nativitate filii per praefatam dominam reginam praefatis nuntiis nostris factam mandato praefatae dominae reginae et conclusa, et consummata sunt. Nos itaque praelati, barones, principes, comites, proceres regni Hungariae superius memorati animadvertentes praenominatos dominos ambasiatores et nuntios nostros electionem praedictam iuxta vim et formam eisdem datam et desiderium nostrum egisse et perfecisse, eandem unanimi voto nostro acceptavimus, gratificavimus, collaudavimus et confirmavimus et praesentium serie acceptamus, gratificamus, collaudamus et confirmamus, et saepefatum serenissimum et inclitum principem dominum Wladislaum Poloniae regem, etc. in dominum et regem regni Hungariae recipimus, assumimus et profitemur ac recognoscimus, sibique tanquam domino nostro naturali et regi debitum honorem, obedientiam, reverentiam et fidelitatem, quamdiu vixerimus, exhibebimus et faciemus, et contra omnes aemulos suos et signanter, qui serenitatem suam in assecutione regni Hungariae et dominiorum
