Szily János: Instructio venerabilis cleri dioecesis Sabariensis (Szombathely, 1884)

PARS PRIMA,

CAPUT I.

Dc Vocatione, et Modo ad Statum Ecclesiasticum perveniendi, et Jurisdictionem consequendi.

Idea boni pastoris, ceu administratorii Spiritus in ministerium missi propter eos, qui haereditatem capient salutis, est excellentissima. Sacerdotem etenim oportet Christum omnium virtutum exemplar vita moribusque continuo exhibere, seu specimen Christi cogitantis, loquentis, agentis patientisque undequaque circumferre ita; ut qui eum viderint, eundem Christiferum jure dicant. Quare si in qua Officii nostri parte diligentiam adhibebimus, sane maximam manifestabimus in suscipiendis, ac promovendis Clericis, ut nonnisi requisitis corporis animique dotibus praediti, et a Deo vocati suscipiantur, et sufficiente doctrina, ac virtute exculti ad curam animarum admittantur.

Quare firmiter statuimus in numerum Cleri junioris nonnisi tales suscipere Alumnos, qui praevio de moribus et scientia serio examine, seposito omni humano respectu, et non attenta cujuscunque commendatione omnino idonei per Nos reperti fuerint, et de quibus probabilis conjectura sit, eosdem non fine aliquo temporali, sed ut Deo fidelem cultum praestent, hoc vitae genus elegisse. Trid. Sess. 23. c. 4. de Reform.

Quo vero Alumni a teneris annis ad religionem et pietatem formentur, ac ecclesiasticis disciplinis