Circulares literae dioecesanae anno 1904 ad clerum archidioecesis strigoniensis a Claudio Francisco Cardinale Vaszary principe primate regni Hungariae et archiepiscopo dimissae
XIX.
214 mundo non estis“ (Jo. XV, 19), conversationem juxta monitum Apostoli (Phil. Ill, 20) in coelis habeant sedulo. Poenitentiam et orationem, utpote firmissima religionis fundamenta, peculiari studio excolant. Contempto fastu, liberalitatem in miseros et causas pias pro paupertatis voto enutriant. Proprii status castitatem omnimode servent, necnon abstinentiam et jejunium ab Ecclesia indicta. Filiali prorsus obedientia tum Romanum Pontificem, tum Episcopos, tum proprii instituti Moderatorem aliosve Superiores ecclesiasticos prosequantur, nec praetermittant civilibus rectoribus obsecundare, ita ut, obedientiae voto licet minime ad- stricti, praepositis tamen universis prompto reverentialique animo morem gerant. Sanctam Patriarchae Benedicti Regulam manibus volventes et instrumenta artis spiritualis ibidem tradita indefesse adhibentes, actus omnes ad eam dirigant charitatem, quae perfecta foras mittit timorem (I. Jo. IV, 18). 3°. -— De Officiis Oblatorum. Imprimis propriae conditionis partes sibi fidelissime explendas sciant Oblati, quum necessariis neglectis, extraordinaria atque perfectiora officia assumere minime deceat. Quapropter quidquid religio fidelibus injungit omnibus, uti orationes matutinas et vespertinas, piam divinorum officiorum diebus Dominicis ac festivis frequentationem, preces ante et post refectiones et caetera hujusmodi, plurimum faciant, eoque minus domestica negligant munera, quo instantius ab Apostolo inculcantur dicente: „Si quis suorum et maxime domesticorum curam non habet, fidem negavit et est infideli deterior“ (I. Tim. V, 8). Praeterea Oblati Ordinis nostri, memores praecepti Benedicti parentis: „Nihil operi Dei praeponatur“ (S. Reg. cap. 43), peculiarem Sacrae Liturgiáé amorem sedulo foveant. Templorum decus, Altarium nitorem, verbo omnia, quae ad divinum opus conferunt, in curis teneant et amore. Sacerdotio initiati Sacra litent assidue ac devotissime, horas canonicas pro munere sancte persolvant. Alii Missae sacrificio psal- lentiumque monachorum choro, quoties fieri potest etiam diebus ferialibus, laeti intersint, vel impediti se illi socient spiritu; imo omnibus Oblatis commendetur, ut si discrete possint, sive horas canonicas, sive Officium Parvum B. M. V. recitent. Ita enim Ecclesiae nomine gratiarum actiones pro acceptis, supplicationes pro impetrandis beneficiis, preces Deo gratissimas, offerent. Inter speciales vero devotiones, a S. Ecclesia probatas et commendatas, S. P. Benedicti Oblatis maxime curae sit cultus sacrosanctae Eucharistiae ac sacratissimi Cordis Jesu, cujus mysteria Sanctis. 0. N. jam pridem revelata gaudemus; tenerrimum praestent obsequium Immaculatae Virgini Mariae; pie colant Angelos et Sanctos, S. Josephum imprimis et gloriosum P. N. Benedictum, aliosque sanctos Monachos. Diligant praeterea Oblati Rosarium B. M. V., Viam Crucis, necnon alia pietatis exercitia indulgentiis ditata, votaque faciant pro triumpho s. Ecclesiae, religionis progressu, haeresum schismatum que exstirpatione, conversione infidelium, emendatione peccatorum, justorum perseverantia ac defunctorum refrigerio. Insuper Ordinis nostri vestigia prementes, orationi laborem Oblati conjungant, ita ut inter fervidiores bonorum operum promotores jugiter adnumerentur. Peculiaria Oblatorum officia sint sequentia :
