Circulares literae dioecesanae anno 1903 ad clerum archidioecesis strigoniensis a Claudio Francisco Cardinale Vaszary principe primate regni Hungariae et archiepiscopo dimissae

XV.

Munere gravissimo Summum Pontificem eligendi Dei Omnipotentis opitulante gratia perfuncti, omnes vos Venerabiles ac Dilectissimi Fratres ante omnia invitamus, ut pro santa Dei clementia, quam assiduis fidelium ferventibusque supplicationibus in acceptis referendam haud immerito censemus, preces grati in Deum animi testes fundatis.

Maximum etenim annuntiamus vobis gaudium.

Spiritus Sanctus per Eminentissimos Patres S. R. E. Cardinales, numero sexa- ginta et duos, per quatuor dies in conclavi coadunatos, Ecclesiae suae viduatae suscitavit Pastorem! „Planctum nostrum — ut Psalmista ait — convertit in gaudium et circumdedit nos laetitia.“ (Ps. XXIX. 12.)

Die 4. Augusti in sessione antemeridiana electus est in Summum Pontificem Em. D. Card.

JOSEPHUS SARTO,

Patriarcha Venetiarum, qui electioni annuens, assumtoque nomine

PII DECIMI,

regimen gregis catholici per universum orbem diffusi potestate coelitus accepta

suscepit, servatis de more omnibus, quae pii saeculorum usus in hoc augusto munere suscipiendo sancivere.

Providum certe evenerat, ut talis Christi in terris eligeretur Vicarius, qui vitae sanctitate, scientia et prudentia inclarescens tanto honore conspiceretur dignus et muneri obeundo onerique ferendo idoneus ac aptus. Ex laboribus enimvero, quibus in bono sociali promovendo Beatissimus Pater hucusque est perfunctus, merito sperare licet, fore, ut Sanctissimus Dominus Spiritus Sancti gratia illustratus indigentias temporum et cognoscat et convenientia illis remedia afferat.

Summus Pontifex Pius X. primam lucem conspexit die 2. Junii anni 1835. in oppido Riese Italiae superioris, dioe- ceseos Tarvisinae. Sacerdos ordinatus breve intra temporis spatium parochus constitutus est in Trombolo, paulo post in Sansano, unde Canonicus Tarvisinus nominatus, eiusdem dioeceseos episcopi Vicarius generalis factus est. Anno 1884. die 10. Novembris ad sedem episcopalem Mantuanam evehitur. Anno 1893. mense Junii Patriarcha Venetiarum nominatus fuerat, quum jam paucos ante dies Sacro Purpuratorum Collegio fuerit adnumeratus.

6

o—-^3