Circulares litterae dioecesanae anno 1884 ad clerum archi-dioecesis strigoniensis a Joanne Cardinale Simor principe primate regni Hungariae et archi-episcopo dimissae
XIII.
93 XIII. Religiosus Ordo Minorum Capucinorum novum nuper Generalem Ministrum elegit, seque in electo, definitoribusque generalibus et custodibus coram Sanctissimo Domino Nostro stitit. Sermo ad praesentes per Summum Pontificem occasione hac directus, et heic subnexus luculenter demonstrat cum quo paterno affectu Beatissimus Pater religiosos Ordines in genere prosequatur, haud paucis in locis per Ecclesiae hostes varie impetitos, tum quantopere optet et commendet, ut in singulis religiosorum ordinum familiis morum sanctitas, quam profitentur, et vitae disciplina vigeat. Dilecti Filii! Est quidem quod delectemur, cum vos hodierna die hoc in loco frequentes numero, natione varios, intueamur. Ipsa enim haec frequentia vestra satis testatur quanta sit et quam mira fecunditas magni Ordinis Franciscani, unde, tamquam ramus ex arbore generosa et nobili, sodalitas Fratrum Capulatorum prodivit. Scilicet singulari munere beneficioque divino illud Francisco Assisiensi contigit, ut alumnorum suorum multitudo ex humili loco ad omnes prope terras propagaretur, idque cum similitudine quadam ipsius Ecclesiae, quae exiguis orta principiis orbem terrarum celeri cursu complexa est. — Atque hunc religiosum ordinem, sicut et ceteros, si homines aut melius nosse aut aequius iudicare vellent, sodalitates religiosas haud sane videremus tam multis in locis tam ingrate tractatas. Verum tamen vincendum in bono malum, enitendumque, dilecti filii, ut in hac rerum asperitate virtus semper emineat iniuriis hominum invidiaque maior. Cogitatio meritorum, quibus Institutum Franci- scanum nullo non tempore excelluit, spem Nobis certam facit fore, ut idem egregios fructus edere ad privatam publicamque salutem perpetuo perseveret. Hac de caussa ipsum Ordinem Tertium singulari Nos studio benevolentiaque semper prosecuti sumus: eumdemque et merito laudum praeconio alias celebravimus, et superioribus etiam diebus per litteras Nostras Encyclicas, sedulitati sapientiaeque Episcoporum commendavimus, ut quem ad societatum clandestinarum prohibenda incrementa non mediocriter ducimus opportunum. Ad hunc ipsum amplificandum ac tuendum consilio praesertim nutuque religiosi viri, quem nuperrime summum Ordinis magistrum optavistis, multum vos operae conferre posse perspicimus ac reapse collaturos non dubitamus. Nr. 2554. Sermo Summi Pontificis ad Praepositos Capucinorum habitus.
