Notitia hungáriae novae historico geographica (Budapest, 2012)

Sopron vármegye

220

COMITATUS SOPRONIENSIS PARS SPECIALIS

Ditio arcis Szarvkő:

4. ) Sirez, Germanis Gschis, unico clivo, ab Okkavia, dirimetur. Vicus est grandis, ordine aedium pulchro et caementicio. Eo fine, qui ad occidentem solem vergit, Ecclesia est, turri praefulta, quam horologium ornat. Incolae sunt Germani partim, partim Croatae, lingua ideo, non vestitu, invicem distincti. Frumento, quam vino, magis proficiunt. Ab ea parte, qua occasum vicus respicit, fons sulphurosus est, idemque balneis commodus. Aedicula ei adiuncta, cados habet, lavationi destinatos, sed nec advenae, si qui accedant, sua opportunitate destituuntur.

5. ) Uszlop, proximus inde a meridie adsedit. Vicus ingens, sed quem A. MDCCXXV. incendium penitus deleverat, adsiduitate incolarum, qui Croatae sunt, reparatum denuo. Voculam Br, tanto opprobrio ducunt, ut furiarum instar, saeviant in convitiantem. Rivus Wolka, medium vicum interluit, agitque molam praestantissimi operis, quam Matthias Trimel, Liberae Regiaeque Civitatis Semproniensis Consularis, posteaque Ginziensis Tabulae Adsessor, exstruxit.

6. ) Margaretha, eidem rivo, post aliquot stadia, meridiem versus, adiacet. Ingens et hic locus, ac fertilis. Incolae sunt Germani, egregii vinitores. Sane vinum huias, post Semproniense, atque Rustense, optimae notae esse creditur. Ad opportunitatem praeterea vici lapicidina refertur, egregiarum operarum, atque proventus.

7. ) Pordán, Germanis Brodersdorff, eodem rivo, altius in occidentem, adluitur. Multum [p. 141.] vico noxia est, frequens eius exundatio. Correpto enim ponte, latissime agros proluit, segetesque offundit, et pabula. Alioquin, rus vico obtigit foecundum.

8. ) Kleinhöffelein, a Wolka, versus Kis-mártonium aliquantum subductus, colitur a Germanis, vinitoribus et agricolis laudatae industriae. Locus, haud grandis, nomen, re ipsa, tueatur.

9. ) Drausdorff, non tam vini proventu, quam fructus gloria caret. Agri frumentarii laus, multo potior: quippe quem, incolae Croatae, scrupulose colunt.

10. ) Zagersdorff exiguus vicus est, monti Austriae vicinus. Unde rigidius ei caelum obtigit, idemque inimicum viti, quam tamen non cessant colere habitatores, vinumque educunt, nulli, inter Croatarum colonias, secundum.

§.II.

Ditio arcis Szarvkő

1. ) Szarvkő, locus grandis Croatici oris, atque aedificiorum, supra sortem vici, praestantium. Situs est ad iter Vindobonense, diversorio, accipiendis viatoribus, opportune instructus. Granarium orae huius diceres, tanta hic frumenti vendibilis vis adservari consuevit. Ea parte, quae in orientem vergit, arx, quam descripsimus, vico imminet.

2. ) Neufeld, cultura proficit, frumenti.

3. ) Büdös-Kút, Germanis Stinkendbrunn, territorium habet, sementi idoneum. Vitis contra, licet satis materia conua[p. 142.]lescat, fructus tamen minus est subacti.

4. ) Winpassing, ab itinere, quod Vindobonam transmittit, nomen accepisse videtur. Ita Laitae vicinus est, ut ponte super flumine strato, Austriae coniungatur. In erectiori amnis ripa, claustrum visitur, quod anno MDCCXXIII. igni deletum, atque iterum restauratum est. Auctorem, qui id fundarit, comitem de Stozing fuisse, accepimus, tantae munificentiae, ut sustentandis sacris viris, plus minus XX. sufficiat. Ordo est, quem Minoritarum vocamus.