A Győri Püspökség Körlevelei, 1914
Tartalomjegyzék
201 XXVIII. Cum per translationem Excellentissimi ac Reverendissimi Domini Leopoldi Árpád Várady nuper episcopi Jaurinensis in Sedem inclytam Archiepiscopalem Ecclesiarum Colocensis et Bácsiensis canonice unitarum, Sedes Episcopalis almae Ecclesiae Nostrae Jaurinensis de jure et de facto vacans reddita sit: Sua Sacratissima Caesarea et Apostolico-Regia Majestas, Franciscus Josephus I. pro suo supremi patronatus iure, quod erga omnes Regni Hungáriáé ecclesias tenere dignoscitur, in vacantem modo praefato Sedem Ecclesiae Jaurinensis episcopum nominare dignatus est ILLUSTRISSIMUM AC REVERENDISSIMUM DOMINUM DOMINUM ANTONIUM FETSER, EPISCOPUM CONSECRATUM PALAEOPOLITANUM, CATHEDRAL1S ECCLESIAE MAGNOVARADENSIS CANONICUM CANTOREM, VICARIUM EPISCOPALEM ET CAUSARUM AUDITOREM GENERALEM, ABBATEM DE CHOLT, SUAE SANCTITATIS CAPELLANUM HONORARIUM, INSIGNIS ORDINIS FRANCISCI JOSEPHI I. MEDIAE CRUCIS EQUITEM CUM STELLA, INSTITUTI SANCTI VINCENTII DIRECTOREM. Divinae sane hanc Providentiae dispositionem, qua Ecclesia nostra Jaurinensis vetustissima, a Sanctissimo primoque Hungarorum Rege fundata et omni venerationis cultu ac filiali obsequio dignissima, viduitate sua nunc soluta est, quinimmo novo nitore et juvenili vigore dotata adornataque resplendescit: iusta in Deum Patrem misericordiarum et totius consolationis gratiarum actione suscipientes, laetiore jam vocis organo preces nostras prosequimur: Benedictus Dominus, qui non amovit orationem nostram et misericordiam suam a nobis. Habemus ergo clementissime nominatum Pontificem, quem inde a multis annis ob ingenii praestantiam, ob caritatis plenitudinem animique candorem omnes dilexerunt, omnibusque aestimationis signis probi sponte ac lubentes prosecuti sunt. Sermo, quem audivimus de Ejus quotidiana cura et munifico subjuvamine erga pauperes et orphanos, de fraternae caritatis aemulatione in infirmos et laesos, de pietate eximia in parentes, de indefessa fatigatione et zelo, ut arentia corda fluentis doctrinae et fidei consolatione irrigaret, — magnum dedit nobis suavitatis odorem.
