A Győri Püspökség Körlevelei, 1900
Tartalomjegyzék
I I. VENERABILES FRATRES AC FILII IN CHRISTO DILECTISSIMI! Laudetur Jesus Christus in aeternum Amen. Ingressi sumus, Deo propitio, annum novum, labentis saeculi novissimum, novemdecim saeculorum a Christo nato defluxorum cursum claudentem, qui potenter animas Christianas provocat ad recolendam grato corde memoriam innumerabilium beneficiorum, quae Christus Jesus, Unigenitus Dei Filius, mundi Redemptor, per fidem et religionem ab Eo de coelo latam, et in Ecclesia catholica ab Eo fundata inviolabiliter custoditam universoque orbi praedicatam, ac per salutis media Ecclesiae suae dispensationi commissa, toti generi humano per novemdecim saecula mira largitate contulit et conferre non desinit. Laudes concinamus — decet —• inclytas Redemptori nostro divino, Regi saeculorum immortali et invisibili, pro caritate perpetua, qua nos homines, multiplicibus licet peccatorum et vitiorum nexibus implicatos, dilexit, diligere non cessat et ad salutis aeternae portum, gratiarum divinarum opere redemptionis nostrae ab Eo susceptae et perfectae nobis impetratarum ac continue oblatarum abundantia, perducere amanter et clementer contendit. A laudibus ideoque divini Redemtoris resonent per hunc annum peculiari modo incessanter templa nostra; ad amandum Eum et ferventius usque redamandum inflammentur corda nostra; ad gratitudinem erga Eum, vitiorum devitatione, inordinatarum passionum refraenatione, perversarum consuetudinum exstirpatione, meliorum et sanctiorum morum induitione, manifeste et constanter contestandam tendant omnia studia nostra; ad deprecationem offensarum Majestati Ejus divinae innumerabilibus et horribilibus peccatis decursu saeculorum elapsorum temere illatarum congeminent lacrymae et suspiria poenitentium animorum nostrorum; ad salutem animarum nostrarum pretioso Ejus sanguine redemtarum in tuto collocandam nostra procedant eloquia, dirigantur cogitationes et opera. In celebrandis exeuntis saeculi solemnitatibus, quibus fidem, amorem et gratitudinem erga divinum Redemtorem Jesum Christum communi concentu totius orbis populi christiani contestari gestiunt, praecipuas partes sibi sumat, oportet, gens nostra, natio Hungara, quae nonum saeculum vitae suae Christianae anno hoc absolvit, quae labore apostolico S. Stephani Protoregis ante novem saecula religione Christi imbuta, in gremium S. Matris Ecclesiae catholicae suscepta, et principe ejus S. Corona per Sedem Apostolicam ornato ceu regnum apostolicum constabilita, pietatis, morum gravitatis et puritatis, fortitudinis, fidelitatis et honestatis per plures centenos ftnnos praeclara specimina exhibendo, sideris instar splendidi aliis nationibus fulsit, cuique datum est semet murum contra inimicos crucis Christi longo tempore ceteris Europae populis Christianis praebere. Nr. 70. Vota Praesulis inchoato anno labentis saeculi extremo.
