A Győri Püspökség Körlevelei, 1883
Tartalomjegyzék
In mea allocutione ad honorabilem Clerum Dioecesanum initio vertentis anni directa pluribus exposui momenta, quae nos potentius provocant, ut octavo- secularem memoriam solemnis elevationis venerandi Corporis Sancti Protoregis Stephani specialiori titulo etiam, qua fundatoris Ecclesiae Cathedralis et Dioecesis Jaurinensis, die 20-a mensis Augusti praesentis anni solemni ritu recolamus; porro ut Deo pro acceptis in Sancto Stephano beneficiis gratias agamus ; et siquidem ille omnem suam plantationem patrocinio Magnae nostrae Dominae impensius commendaverat, ut hac ipsa solemnitate Ecclesiam Catholicam, Patriam et Augustissimum Regem nostrum Apostolicum, exemplo et verbis Sancti Stephani, Eidem Magnae Dominae nos quoque devoveamus; denique ut pro Ecclesiae, Regni et Regis incolumitate Deum supplici devotione exoremus. Restat, ut nunc modum asservandae hujus devotionis publicatis Ordinibus designemus. Itaque 1. Dominica 13-a post Pentecosten ex ambone publicetur solemnitas fideli populo, et ad fundendas pro Ecclesia, Patria et Rege preces praevie omnes provocentur. 2. Die 19-a Augusti post salutationem Angelicam vespertinam concentu omnium campanarum horae quadrante duraturo annuncietur insequentis diei festivitas. 3. Die 20-a Augusti in sacro Sermone celebrentur beneficia, quibus Deus gentem nostram per Sanctum Stephanum Regem beare dignatus est. 4. Post sacrum Sermonem, si adjuncta permiserint et tempestas faverit, ducatur processio ad aliquam Statuam vel Capellam B. Mariae Virginis, in itu et reditu Litanias Lauretanas vel aliam populo notam cantilenam de B. Maria Virgine decantando. In Capella vel ad Statuam B. Mariae Virginis, praeorante officiante Sacerdote, dicantur preces his cum Circularibus dimissae. — Si vero tempestas non faveret, tunc hae preces dicantur immediate post sacrum Sermonem. 5. Sequatur Sacrum Solemne. 6. In fine decantetur hymnus Ambrosianus „Te Deum“ cum consvetis versiculis et orationibus, item cum commemoratione pro Rege Apostolico. Caetera addet ingeniosus singulorum amor. Deus exaudiat preces nostras, et intercedentibus Magna Domina et Sancto Rege nostro Stephano tribuat Ecclesiae, Regi ac Patriae nostrae pacem et omnigenam prosperitatem. Jaurini, die 18-a Junii 1883. Nr. 1750. Solemnitas octavo-secula- ris S. Stephani Regis Hung. 13
