A Győri Püspökség Körlevelei, 1878
Tartalomjegyzék
3 pugnet, nullus lupus de castris coelestibus rápiat, nullus laqueus inducat, nullus dolor vincat, nullus cruciatus adfligat.“ Beatum dicamus populum, cui haec sunt. Veniet, veniet dies, qua Deus inimicos Sanctae Ecclesiae humiliabit, et superbiam eorum elidendo, contumaciam dexterae suae virtute prosternet. Confratribus autem nostris hodie misere adflictis post tantae tempestatis atros turbines aer placidus et optata lux iterum refulgebit, discussoque transacti temporis nubilo pax iucunda et serena mentes omnium denuo laetificabit. Haec expendentibus nobis occurrit consideratio et comparatio sortis nostrae. Ingrati essemus erga Deum, si cunctaremur profiteri nostram conditionem illa memoratorum Catholicorum plurimis vicibus esse prosperiorem. Nos, sint Deo aeternae grates, sub coelo utcunque sudo vivere, in portu tranquillo morari videmur. Restat, ut Dei imploremus benignitatem; Ille nos defendat, ne coelum nostrum nubibus obscuretur, ne carina nostra scopulis laedatur. In protectione itaque Sanctissimi nominis Jesu confisi procedamus hoc etiam anno in tramite vocationis nostrae. Operemur nostram nostrorumque salutem et assiduo in vinea Domini labore, vitae sanctitate et amore in Deum ac homines Dei auxilio et ultronea defensione nos dignos reddere satagamus. Patientia et passiones confratrum nostrorum sint prae oculis nostris. Eorum exemplo formati, quidquid sinistri minusque grati nobis occurrerit, Deo adiuvante facile superabimus. Quod vero vobis, Venerabiles Fratres ac Filii Dilectissimi, hoc anno specialius commendatum esse cupio, est fraterna dilectio, quam ipsae adeo divergentes in politicis negotiis opiniones non semel turbarunt. Anno isto, prouti omnibus vobis notum est, eligentur Repraesentantes populi pro Comitiis Regni. Ipsi nostis, quot mala, quae funestae dilectionis fraternae turbationes solent in societatem humanam ex actu harum electionum redundare. Agite itaque, ut vos, Dilecti Filii, inter vos pacem habeatis et obversante licet aliquando opinionis diversitate in sensu charitatis eiusque manifestatione nihil in vobis desiderari sinatis, fidelibus vestrae curae concreditis hoc modo exemplo futuri et eos ad similiter agendum hac via facilius permoturi. Opiniones politicae, salva singulorum honestate, possunt esse quandoque divergentes: ast charitas semper eadem perseveret, nec reciprocum erga aliter sentientes aestimium unquam eclipsim patiatur. Vestris fidelibus consilio adesse semper parati sitis. Hoc iuris nemo aequus vobis, qui fideli populo proximi estis, denegabit, ius, inquam, quo etiam advena quisque se pollere credit. Sententiam vestram invitis alioquin non obtruditis, eosque in suo sensu abundare sinitis. Dum tamen vos ad consilia fideli populo suppeditanda paratos esse volo, absit a me id vobis commendare, ut duces sitis eligentis turbae, ut coryphaeorum dubiae gloriae munus in vos suscipiendo dignitatem status vestri obfuscare pergatis et odio ac contemptui aliter sentientium vos exponatis. Bonum, quod victores fors obtineretis, plurimis vicibus minus est malo, quod in personam vestram et munus vestrum sacrum, praesertim apud aliter sentientes, conscisceretis. Hoc itaque dico: quemadmodum laudabile opus estis facturi fidelibus vestris, singuli nempe vestrum propriis suis parochianis, consilia salubria suggerendo : ita in dignitatem vestram vestrumque sacram munus peccaretis, si ultra dictos limites prosiliretis. 1*
