A Győri Püspökség Körlevelei, 1867
12 assidua Evangelii praedicatione se omnium servum fecit: factus est enim puer inter pueros, et mundo contemptibilis, ut fidei rud'menta pueris traderet, et rusticanos agrestesque homines lucraretur: factus est etiam infirmus infirmis, ut infirmos lucrifaceret; omnibus omnia factus est ut omnes faceret salvos. Diuturna denique aegritudine ac evangelicis laboribus confectus pauper et nudus ad Christi amplexum evolavit, ut promissam humilibus et pauperibus beatitudinis coronam consequeretur. At Deus Omnipotens qui servum hunc fidelem et pauperem de stercore erexerat, ut cum Principibus regni sui collocaret, voluit ut fidelibus gloriae ejus fastigium innotesceret: proindeque Venerabilem Benedictum signis et portentis clarescere fecit. Quorum tria ad gravissimam Sacrorum Rituum Congregationis disquisitionem semel, iterumque, et tertio proposita fuerunt; scilicet in Antepraeparatorio Conventu in aedibus Reverendissimi Cardinalis Constantini Patrizi Episcopi Portuensis et Sanctae Rufinae, Sacrorum Rituum Congregationi Praefecti, et Causae Relatoris Nono Kalendas Martii Anni MDCCCLXV. coacto: deinde in Consilio Praeparatorio Revmorum Cardinalium Sacris tuendis Ritibus praepositorum in Palatio Apostolico Vaticano decimo Kalendas Marti' anni vertentis habito: postea in Generalibus Comitiis coram Sanctissimo Domino Nostro PIO PAPA IX. in eodem Palatio Apostolico Vaticano decimoquarto Kalendas Octobris collectis; ubi proposito Dubio a Reverendissimo Cardinali Causae Relatore „An, et de quibus Miraculis constet in casu, et ad effectum de quo agitur?“ Consultores primum et deinde Patres Cardinales proprium dedere suffragium. Verum Beatissimus Pater decretoriam sententiam suam haud pandidit, voluit enim ut effusis ex animo precibus in divini luminis splendore quid a se decernendum esset, intelligeret. Annua demum recurrente Pauperum Legiferi solemni commemoratione, cujus haereditatem in terris Venerabilis Benedictus adipisci conquisivit, sanctissimus Dominus Noster Eucharistico Sacrificio summa animi devotione in suis pontificiis aedibus ad Vaticanum oblato ad Basilicam hanc Petri Apostolorum Principis cultu toto terrarum Orbe insignem, contendit, ubi in sacello Virgini Deiparae sine labe originali conceptae et Assisiensi Patriarchae rite consecrato penes se vocavit Revmum Cardinalem Constantinum Patrizi Episcopum Portuensem et S. Rufinae, SS. Rituum Congregationi Praefectum, Causaeque Relatorem, itemque R. P. Petrum Minetti Sanctae Fidei Promotorem, et me infrascriptum Secretarium, quibus adstantibus declaravit: Constare de Miraculis a Deo, Venerabilis Benedicti ab Urbino interventu, patratis; scilicet de primo Instantaneae, perfectaeque sanationis Josephi Fierrucci ab Ophtalmia acuta, leucomate superaddito: de altero: Instantaneae perfectaeque sanationis Dominici Bargnoni a phthisi pulmonari, gravissima concomitante pneumonorrhagia; de tertio; Instantaneae perfectaeque sanationis Lauretae Volpi ab inveterata angina phanngea gravibus stipata symptomatibus. „Hujusmodi Decretum de more evulgari, et in Sacrorum Rituum Congregationis acia recenseri voluit quarto Nonas Octobris Anni MDCCCLXVI.“ C. Episcopus Portuen. et S. Rufinae Card. PATRIZI S. R. C. Praef. L. f S. D. Bartolini S. R. C. Secretarius. Jaurini, die 24. Januarii 1867. Joannes m. p. Episcopus.
