Novák Ádám (szerk.): Fontes Memoriae Hungariae III. Varsóban őrzött magyar vonatkozású oklevelek, 1439–1489. Közreadja: Novák Ádám, Tóth Orsolya és Tóth Péter (Debrecen, 2019)
Oklevélszövegek - 166
166 78. 1489. április 23. Prága. Ulászló cseh király oklevele, amelyben szövetséget köt Kázmér lengyel királlyal Mátyás magyar király ellen és segítséget ígér neki. Nos Wladislaus Dei gratia Bohemiae rex, marchio Moraviae, Luxemburgensis et Slesiae dux ac Lusatiae marchio etc. Notum facimus tenore praesentium, quibus expedit universis. Animadvertentes utilitatem, et gloriam regni nostri, cui in praesentia domino ita disponente praesidemus, in eo maxime consistere, si omni studio et diligentia operam dederimus, ut subditos nostros non solum hoc tempore in pace, otio, et tranquilitate conservemus, sed etiam a futuris et imminentibus casibus, et periculis, quantum saltem humana providentia fieri potest, muniamus, quo et calamitate , et metu calamitatis liberi, commodis suis eo melius incumbere, et insistere possent. Id autem nos potissimum ea ratione efficere posse confidimus, si principes et populos regno finitimos foedere nobis, et amicitia iunxerimus, quorum ope et auxilio his, qui se nobis non culpa nostra, sed propria temeritate, et praesumptione inimicos constituent, acrius, vehementiusque resistere valeamus. Quoniam autem serenissimus princeps et parens noster carissimus dominus Casimirus Poloniae rex etc. eo nos affectu fovet, et amplectitur, his prosequitur beneficiis, ut facile appareat eum, et indulgentissimum patris, et amicissimi principis erga nos animum habere. Dignum putamus, neque tantum Regnis nostris, sed etiam universae christianae reipublicae utile et necessarium, cuius salus in concordia regum et principum maxime versatur, arctissimum illud naturae, quod inter nos est vinculum, solidius, et firmius reddere, et principes, proceresque nostros, tam ecclesiasticos, quam saeculares, et populos utriusque nostrum dictorum, et imperio subiectos ita colligare, et coadunare, ut mutuo fulti praesidio, omnem hostilem vim, siqua saltem emerserit, cavere et propulsare possent. Quam ob rem matura deliberatione et consilio habito et utilitate regni nostri cum proceribus consilii nostri participibus sedulo discussa, cum memorato serenissimo domino rege Poloniae sub hac forma, et conditionibus foedus, unionem, et concordiam inivimus, imo inimus, facimus, et firmamus promittentes, quod si serenissimus princeps dominus Mathias rex Hungariae concordias, tractatus, pacta, et foedera inter utrumque nostrum et regna nostra cum praefato domino rege et regno Hungariae habita, et facta, quibus nolumus hac nova nostra concordia in aliquo derogari, prior violaret, et contra nos vel praefatum dominum regem Poloniae, aut regna nostra hostiliter insurgeret, nosque vel alterum ex nobis, aut regnum alterius nostrum per se, vel quempiam alium, aut quascunque submissas personas aggredi conaretur, vel de facto invaderet quocunque tandem colore quaesito, extunc nos cum primum a praefato domino rege Poloniae admoniti, et requisiti fuerimus, pro omnibus nostris et regni nostri
