Novák Ádám (szerk.): Fontes Memoriae Hungariae III. Varsóban őrzött magyar vonatkozású oklevelek, 1439–1489. Közreadja: Novák Ádám, Tóth Orsolya és Tóth Péter (Debrecen, 2019)
Oklevélszövegek - 125
125 Elizabeth regina adverso aemulorum et verius forensium et extraneorum hominum intestini belli viam potius aperire, quam praecludere cupientium freta consilio priorem et praeassumptam intentionem removens, satagensque et volens hoc regnum et nos regimini infantuli dicti condam domini Alberti regis nati posthumi, hoc est post eius obitum in lucem educti, parum nostri et regni eiusdem necessitati succurrere potentis subicere, ad impediendumque praetactae electionis et coronationis utile opus toto nisu hanhelans, sublata heu, clandestine de castro Wyschegrodiensi corona illa, qua hactenus reges Hungariae coronari soliti fuere, pridem antedictum infantem vix adhuc trimestrem praeter omnium nostrum voluntatem ad hoc sponte concurrere debentem atque contra consuetudinem hucusque in simili re tentam, absentibus etiam omnibus paramentis sacris, necnon gladio, sceptro, pomo et cruce legationis Sanctissimi Stephani primi regis nostri multo amplius in perniciem, quam utilitatem nostram cum eadem corona sublata coronari, si sic dici dignum est, fecit et procuravit atque continuo ipsam coronam, proch dolor, viceversa concludens, ad locum hactenus nobis incognitum in crudele omnium nostrum derogamen transmisit, seu asportavit. Ob hoc nos exnunc altera vice in multitudine tam copiosa, quantam memoria hominum praecedentium regum coronationis tempore non compraehendit, congregati matura plurium dierum deliberatione praehabita, ex quo corona illa supratacta praevia ratione, ut opus erat, tam facile exnunc haberi non potuit, volentes et consultius cupientes necessitati nostri et huius regni, cuius et confinia per insultationem inimicorum, paganorum scilicet et aliorum morsus asperos continue lacerantur, opportune providere, considerantes etiam potissime, quod semper regum coronatio a regnicolarum voluntate dependet et efficacia ac virtus coronae in ipsorum approbatione constitit, videntes nichilominus regnum hoc regis idonei festina tuitione carere non posse, eundem serenissimum dominum Wladislaum regem pari voto et communi desiderio alia corona aurea operis vetusti Beatissimi Stephani regis, apostoli et patroni nostri in theca capitis reliquiarum eiusdem hucusque multa veneratione conservata instituimus, disposuimus et decrevimus debere coronari. Quam coronationem die hodierna, invocata suppliciter Spiritus Sancti gratia et eiusdem, ut pie credimus, instinctu cum peractione publica et manifesta omnium illorum cerimoniorum, quae ad eandem et eius efficaciam ac solemnitatem concurrere debuerunt, induto praefato domino nostro rege illis omnibus paramentis et indumentis sanctissimi primi regis nostri, atque oblatis eidem ac manibus suis traditis gladio, sceptro, pomo ac cruce legationis eiusdem sancti regis, necnon aliis omnibus necessariis absque omni defectu, praeter solam sublatam coronam praetactam, feliciter consumavimus et praeconceptum, auspice Domino, conduximus ad effectum, decernentes, pronuntiantes et declarantes per haec scripta ipsam modernam coronam et coronationem omnem illam virtutem et efficaciam, illudque robur per omnia habere et habi-
