VJESTNIK 3. (ZAGREB, 1901.)

Strana - 232

232 vrata svetom vodom, dojdeju oni k njemu i veliju mu nek prestane već hitati na vrata to teško kamenje. Onda im on veli, da ne bu pređi prestal, dok ne dobi ono kaj on išće, pak im pove, da ga je njegov otec vu velikoj nesreći jednomu staromu sedomu vragu zapisal, a on da je sad došel po onaj list na kojem je on zapisan samom očevom krvi, i da ne more pređi, dok ne dobi to natrag, postati pop, i pak je začel okolo škropiti svetom vodom, da nisu vragi od straha znali, kaj bi počeli. Da se pak rešiju njega začeli su ga pitati : je li je taj, je li je taj? i dopelali su pred njega puno puno vragov. On im je pak rekel, da ga on ne pozna, da on još onda ni niti na svetu bil i da samo to zna, da je jen sedi jako stari. Sad dopelaju vragi jednoga sedoga starca vraga i veliju, ako ni taj, onda ni nijeden drugi i veliju mu, da nek da tomu crnomu dijaku njegovo pismo. Kad pak on ni htel dati, veliju mu, da ga buju hitili na Martin-Luterovu postelj. Sad se okrene taj dijak i vidi za sobom razbeljenu postelj punu samih oštrih čavlov i nožev, i tak je videl Martin-Luterovu postelj i ni trebal pitati za nju. Stari vrag se je pak prestrašil Martin-Luterove postele i taki mu je dal njegov list, gdi mu je bil on zapisan, a crni dijak je taki odišel od pakla. Onda je opet došel vu onu hajdučku hižu i povedai je harambaši, kaj je videl. Harambaša se je čisto spokoril i opet ga je prosil, naj ga dojde pričestiti, kad bu već pravi pop. Dijak mu obeča, ali mu veli, nek ide snjim i vzeme jednu batinu. Kad su došli na jedno mesto, zabode on tu batinu vu zemlu i veli hajduku, nek on tu kleči za pokoru tak dugo, dok on dojde s svetom pričešću, i na to otide. Kad je taj crni dijak donesel biskupu onaj list iz pekla, na kojem je bil vragu zapisan, naredil ga je mam za popa. Za 7 let odpela se taj pop na ono mesto, gdi je ostavil harambašu, i kad se dopelaju tam vidi on onde tak lepe kruške, da je taki slugi rekel, da mu ih par donese. Sluga otide i kad hoće kruške otrgnuti, začuje na jen put glas: „koji me je zasadil, on nek me i trga." Sluga se prestraši i otide gospodinu i pove mu kaj je čul, a onoga hajduka ni on videl. Kad dojde pop tam, vidi da onaj harambaša još kleči i da se moli i plače, a od njegovih suz se je ona batina razgranila kakti drvo. Kad je videl, da se je on čisto pokajal, pričestil ga je i taki, kad ga je pričestil, nestane harambaše Martina Lutera. Raztepel se je na sunčan prah, a iz njegova tela izleti čisto beli golubček, njegova duša, vu nebo. II. Zlatna kupica. Jen put je živel jen logar, koji je imal ženu i puno dece. Jednoga dneva je išel logar vu šumu na vadasiju, da si priskrbi nekaj za jesti. Kad je on •tak dugo i dugo bil na vadasiji jako ožedni, ali nije nigde videl nikakvoga vrela ili zdenca, da bi se napil. Kad je on tak dugo žeden hodil po šumi opazi on na veliko veselje jedan zdenec, ali na žalost nije imal, da si ščim zagrabi. Kad se on prignul vidi u zdencu jednu zlatnu kupicu, ali nije mogel do nje, da bi se napil. Kad je on tak gledal, opazi on jednoga staroga gospona sa celindrum na glavi. On gospon je bil vrag. Kad se ovaj gospon približi k zdencu upita logara, kaj on tu delà. Kad mu logar odgovori, da bi jako rad pil, ali nemre do one zlatne kupice, on gospon mu odmah reče, da mu on van donese onu kupicu i bu mu dal, da se iz nje napije i da bu za tim njegova, ako mu da ono, za kaj on nezna, da ima doma. Logar je odmah počel premišlavati kaj bi to moglo biti, ali se nije setil, da mu je žena noseća.