ARHIVSKI VJESNIK 28. (ZAGREB, 1986.)

Strana - 27

Winfried Schulze, Novi izvori za povijest slavonske seljačke bune 1573. Arhivski vjesnik, 28/1985. str 7—44. • Prijepis Br. 12 1573, veljača, 16, Insbruck Nadvojvoda Ferdinand Tirolski obavještava nadvojvodu Karla o pripremanju vojne jedinice koja će sudjelovati u gušenju seljačke bune. Durchlauchtiger. Wir haben E. L. schreiben vom dato den achten tag die gegenwürttigen monats februari an heut den sechzehenden bemelts monats umb zehen uhr vormittags aus hannden derselben curier empfanngen. Und daraus gleichwol E. L. halben mit besonders brüederlichem mitleiden vernommen, was sich in E. L. gebiet und landen vermittelst der rebellischen zu der herrschafft Sossed gehörigen unnderthanen zuegetragen. Herwiderumb aber gerne gehört, das diesselben rebellen vermüg des zugelegten postscripta durch den widerstand, so innen durch E. L. zuge hörige beschehen, ettwas schaden und abbruch ires fürhabeins eingenommen, des versechens, es soll und werde inen zu schrekhen unnd forcht geraichen. Und demnach nun aber dennocht dise vergadderung unnd aufrur nit zu verachten, sonder derselben zeitlichen zuverhüetung merer weitterung wol achtung zu geben. Und auf die mitl zur notwendigen abstellung und Versicherung diennstlich zu gedennkhen. Inmassen wir aus berhüertem E. L. schreyben befinden, das sy hierynnen guette bestellung unnd fürsehung thuen. Dieweyll dann wir unns nicht allein der brüderlichen verainigung unnd was unns in denen und dergleichen feilen gegen E. L. zu thun gebürt woll zuerynnern wissen und uns schuldig erkhennen sonnder ebenermassen und gleich so wol brüderlich genaigt und erbietig sein, mit und neben, E. L. alles unser vermügen darzusezen unnd dieselbige gar nit zuverlassen. So thun wir innhallt E. L. brüderlichen begerens gleich strackhs die gewisse und aigentliche fürsehung. Das doch in still und geheim für E. L. in disem unnserm lannd der Frl. Drl. Tyrol vermittelst eines taugentlichen haubtmans und annderer bevelchsläuts von fünff- bis in sechshundert knecht in bestallung genomen werden. Welliche allso auf fernem E. L. beschaid und bevelch warten, und derselben alle gehorsami laisten sollen. Wiewol es derzeit an teuglichen bevelchs- und kriegsleuthen in disem lannd aus Ursachen, das wir jungst seiner Kü. würde unnd lieb zu Hispanien zway starkhe regiment aus unnsern lannden unnd Gebieten auf das mör wider den Türkhen zu gebrauchen zuestehen lassen. Deren noch zur zeit wenig herwider khommen ettwas plos, so sollen doch bemelte anzal E. L. so guet manns in der eyll bekhommen khann ervolgen. 27