ARHIVSKI VJESNIK 11-12. (ZAGREB, 1968-1969.)

Strana - 94

Item (12) Ni ieden mester, ali detich, nema imenom bosym blazniti, ali pszuvati, y akosze koi vutom naide, koibi to chinil tako vszaki takav, presz vszaki milosche, imasze birsaszti vu czeh na dva funta voiszka, y takaisse mester, ali detich, buduchi, koibi te takove rechi, ili blaznoszti chul od koiega szvoiega tovarussa, ili brata czeskoga, tebi na znanie nedal, pred Czehom y Czehmestrom nyhovim, te takov dusanie dati birszaga vv Czeh ieden funt voiszka. Item (13) Akobi koy mester, ali detich, szvoim koim tovarussem szvadu, ali kakovu karku zachel, ali koga spotal neszpodobno rechmi, tako Czehmester ima megy nymi mir vuchiniti, akobi pako onde Czehmestra nebilo nazochi, tako drugi mester, ali detich, mora mir vuchiniti, koibi pako to nehotel vuchiniti, y k miru prisztati, tako te takou bude dusan med bratui ili czeh ieden funt voiszka za birsag dati, akobi pako tako velika pszoszt vpala, ali kriuicza iednomu od drugoga vuchiniena, tako to takovo pred plemenitim tolnachem bude sze moralo oprauiti. Item (14) Da nema ni ieden loncharszki detich za peneze igrati, malo ni vnogo, y akobi koi to prekersil, dusan bude pol funta voiszka birsaga vu czeh platiti. Item (15) Akobi koy detich vu szvoiega mestra poštenu hisu ili sztanie koju nepoštenu senszky glavu dopelal, ali drugo kakovo nepošteno duguvanie chinil, y akobi to niegou mester vpamet uuzel, takoie dusan mester to takovo duguvanie goszpodnu Rihtaru na znanie dati pravo poleg varaske vernoszti y szvoje conscientiae y pod velik birsagh. A mester da nema ni ieden prekorubcze to takovoga malovrednoga y nechisztoga duguvania pri szvoie hise terpeti. Item (16) Akobi koy mester ali detich vu kerchme pil da nema sergu ili koyemu drugomu tomu takovomu napiti ni szvoiega mertuka dati piti y akobisze to koiemu utegnulo prekersiti te takou dusanie vu Czeh ieden funt voiszka za birsag platiti y dati. Item (17) Akobisze mester ali detich prevech piuch vinom obszilil, tako dabi vinom van vergel, te takou zaosztaie na Czeh dva funta voiszka. Item (18) Da nema ni ieden mester liuczkoga deticha k szebe prezauati y prezuati y koibi to vuchinil, te dusan bude vu Czeh za birsagh dati prez vszake milosche chetiri funte voiszka. Item detich akobisze dal od szvoga mestra drugomu prezuati, y ob szvoie volie da bi tako k drugomu mestru possel, te takov dusanie vu Czeh dva funta voiszka dati y platiti.