ARHIVSKI VJESNIK 11-12. (ZAGREB, 1968-1969.)

Strana - 93

Item (3) Akobi koy detich loncharszki szimo vu Varas Varasdinszki dovandruval, koibi hotel pri koiem mestru delati, takou vszaki moral bude y dusan v jutro o petih vurah k delu zacheti y k vecheru do szedmih delati, a niemu polag czeskoga obichaia da sze ima k obroku vino davati. Item (4) Akobi koy detich vtegnul uu velik beteg vpaszti, koibi tako vubogh bil, dabisze nemal v szuoiem betegu chim prigledati, tako imaiu czeska bratia iz czeske ladicze na niega trossiti y marliuo niega prigledati, akobi pako detich ozdravel, da ima pri szvojem mestru do teh dob delati y szlusiti, doklam on rechene czeske peneze saszlusi, y nazad vu rechenu czesku ladiczu pošteno poverne. Item (5) Akobi koy detich prez zroka czeli tieden, kada ni szvetka, nemogel pet fertaliou kahel zgotoviti, takomu niegov mester ne dusan niegovoga tiedna plachu dati napunoma y platiti. Item (6) Takaisse da ima vszakomu detichu na tieden plache chetiri grossi iti, a koteri detich na fertal delà, niemu ide od vszakoga fertalia dva novcza, tak daszi szam ima zemliu tlachiti. Item (7) Koy detich na funt kahle delà y vsze zgotovi, takomu ide od nyh pla(c)he tri grossi y ieden bech, a od szpodnyh kahel damu ide od pol funta za ieden funt gornyh kahall. Item (8) Kad detich kahlie dobre y sznasne z kipi delà, takomu ide od vszake takove kahlie ieden bech, item od treieh gladkih kahel idumu dva becha, item od vszake koiasze silt zove, koia zgora na vuglu sztoi idemu ieden kraiczar, item od kahlie koia szpodi na vuglu sztoi, idumu tri bechi. Item (9) Ako koy detich czinieno pech nachini y posztavi, kakosze dosztoi, idemu od nie pet grossev. Item (10) Koy detich prosztu pech nachini y posztavi, idemu od nie oszem kraiczarou, akoli pako malu pech posztavi, takomu ide seszt kraiczarov, item kada komin detich zigye, ili kotel v pech uzigiava, takomu trety novecz ide. Item (11) Ako detich na fertaly delà kahlie, takomu od vszake kahlie ide ieden bech, akolibi kai sztaroga kerpal, takomu polovicza ide. 93