Faut Márk és Klein Menyhért krónikája 1526-1616; C sorozat, 1. kötet - Sopron Város Történeti Forrásai (Sopron, 1995)
Die Chronik
Dise 1614. vnd 1615. Jahr ist der Curfurst von Prandenburg Caluinisch worden, vnd hat sein ganzes land reformirt, vili buecher vnd disputatiónes derowegen außgangen. Diß 1615. Jahr ist Johan Sartorius Euangelischer prediger zu Hörnalß bei Wien gestorben vnd mit beglaittung viler Tausent Menschen begraben worden von Wien auß. Item hat man Herrn <H> Johanni Schnelskhi daselbst das Predigen von der Landschafft in Oesterreich eingestellt, vnd H(err)n Gorgen N., welcher zu vor Caluinisch soll gewesen sein, zu Predigen aufgestellt. Der Orator Negroni, dessen obengedacht (:wie der Turkhische orator Vnsern khaiser Matthiae in Junio diß 1615. Jahr enttekht hat:) soll die beßten Edlgstain vnd Perl auß vnsers khaisers Verehrung heraußgenumen haben, vnd gar schlechte darfür hineingesetzt: auch soll er gesagt haben zum Nassuff Wascha, sein khaiser Matthias sei ein khleine Person, sei zum khrieg Nicht vil werth, (82 v ) Wien sey ietzt leicht einzunemen, sei nicht wol proviantirt, deßgleichen Rab vnd Comorn. Er, Nassuff Wascha, hat 5 Million gollt beieinander, khontte mit disem gellt wol Wien etc. belegern. Wie der Turkhische khaiser Ihme Negroni etliche furneme gefangne Christen geschenkht, hab er dieselben beraubt vnd andern Türkhen wider verkhaufft. Der Clesel, welcher ietz an Stadt deß khaisers zu Wien regieret, Zaigt an, weil er lebe, soll der H(err) Colonitsch Nicht los khomen, so ist Cardinal Forgatsch ietz stats bei den Clesel. Der khaiser ist gehn Prag in Monat Junio diß 1615. Jahrs, die Behem wollen den Clesel Nicht haben bei iren vnd deß Khonigreichs beratschlagungen. Der Khaiserin hat man eine Wiegen Mit etlich Tausent Cronen verehret: etlich sagen, sy soll Nicht schwanger sein. (83 r ) NB. In disen 1615. Jahr In Maio ist ein sehr grosser reiff gefallen, hat in Mahren, Oesterreich, vnd alhie in den Nähern Weingepürgen grossen schaden gethan. In disen Jahr ist ein Morder, der 90 Mortt soll gethan haben, zu Prag einkhomen, der hat auch ein Schwanger Weib aufgeschnitten, daß Khind herauß genumen, auß demselben das Hertz vnd leber gerissen vnd gessen, vnd in den Bauch des Weibs ein Hund hinein gestossen vnd genäet.
