Faut Márk és Klein Menyhért krónikája 1526-1616; C sorozat, 1. kötet - Sopron Város Történeti Forrásai (Sopron, 1995)
Die Chronik
Wan ein Testament in einen Puncten nicht recht sei, ob es allßdan gar nicht gültig: oder ob es heisse Utile per inutile non vitiatur vei cassatur. (80 v ) 1615. Ist diß Jahr das Beneficium S.Kunigundis, welches vber 47 Jahr bei den Pfarrhoff gebliben, den Pfarrhoff vnd den Pfarrherr besser damit zu erhallten, absque praescitu Communitatis dem Bischoff Napragi auff sein bitten vnd Tröen gegeben worden, doch ohne vorwissen vnd aigentlicher verwilligung einer gantzen gmain, auff sein leben lang, vnd hat dises 1615 Jahr der Bischoff Demetrius Napragi bei 3000 Emer wein darzue im Zehend bekhomen. (80 r ) Herrn Hansen Schwänzen handschriftt: {A(n)no 1615° D(omin)i den 19. februári frue gegen zwischen 3 vndt 4 Vhr ist ein Ertpidn gewesen zu Wien vnd vmbher, die hat so lang gewert, daß Man ein Vater Vnser hette khinen auss Betn. Soll Verantterung der Regiment bedeiten. Gott sei Vnss Gnedig.} NB. Des gueten Ehrlichen Mannß H(errn) Gerg Florhamer khan vnd soll man alhie Nicht vergessen, welcher vil Jahr ein Treuherziger Spittlvatter mit seiner Haußfrau Afra (:Die sonderlich armen leuthen vil liebes vnd guets gethan:) gewesen, darnach <die 2> 7 Jahr das gantz Pharambt sorglich Mueßen verwalten. Lang zuvor aber (80 v ) 9 ganze Jahr der Schiferischen Erben ir schönes guett verwaltet vndt erhalten vndt den Michel Grafen hat laßen Studirn zu Wittenberg vnd seiner Schwester Khinder auff die heutige stundt erhallt vnd zu studirn auffs vleissigst hallt. Wie aber Manches Mahl manchen gedankht wirtt, der sich wol verdienet, das gibt laider die erfahrung, wan nur nicht, wie manchen < reichen > vattern vnd Muetter geschieht, Noch vbler wirtt abgedankht. Den 11. Marth A(nn)o 1615. Ist alhie H(err) Fridericus Sch[n]ebelius ein gelehrter Mann vnd gar gueter Musicus, der vil guets bei diser Stadt, da er lenger hette leben sollen, hette khonnen in khirchen vnd Schuelen auch sonsten ainrichten, hat sich khaum vor einer quatember mit weib, khind vnd allen den seinen in sein erkhauffts hauß, welches des Michel Traxl zuvor gewesen, hat eingezogen, dem Gott gnedig sei. Sic mors capit optima Terris. (81 r )
