Faut Márk és Klein Menyhért krónikája 1526-1616; C sorozat, 1. kötet - Sopron Város Történeti Forrásai (Sopron, 1995)
Die Chronik
sollen darneben noch ferner vmb eine gnade, wegen vnser gelaissten fidelitet gegen dem Hauß Osterreich, starkh anhalten, so möchten wir etwas < stand > bestandiges vnd (72 v ) Immer wehrendes erlangen. Wir sollten sehen, daß wir vnß den Secretari Muschinger vnd < H > sonderlich den herrn Paul von Starnberg zum bestendigen freunden Macheten. Wan wir währen (:vnsern fürnemen Nach:) gehn Prag geraiset vnd dortt dem Khonig suppliciret, hetten wir doch nichts ausgerichtet, sondern gar wil vmbsonsten verzehren Muessen vnd wäre doch vnser sachen auff die Osterreichische Lantschafft remittirt worden. Darzue hat man ietzt zu Prag nicht mit priuat sachen zu thuen vnd hette diß die Behemen selbst verdroßen. Zu dem vnd sonderlich, wan diß die Österreicher hetten erfahren, daß wir außer deß landes, <wi> gleichsam wider sie vnd ire privilégia, hetten supplicirt vnd die Märischen, Behemischen, Schlesischen auch Polnische landen für vnß zu Intercedirn anersuecht, ohne vorwissen der Oesterreichischen landschafft, hetten wir vnsere sachen gar vil erger gemacht. Dan wie der von Hoffkhirchen von den Oesterreichischen Landschafft (73 r ) in das Römische Reich ist geschikht worden, nuer daß die Euangelischen Curvnd Reichsfürsten für die Oesterreicher Intercedirn sollen bei denen Erzherzogen zu Osterreich vmb das freylaßen der Euangelischen religion, Ist der H(err) von Hofkierchen nach seiner Haimkhunftt allßbalt zu hoff in die Verwahrung genumen worden, vnd seine Canzlei sambt allen briefen darnach durchsucht worden, vnd haben die Erzherzogen eine grosse vngnad damals auff die Stand in Oesterreich geworffen: Also (:sagt H(err) Morsch:) wäre es euch Oedenburgern bei den Oesterreichern auch auff eur voriges fürnemen ergangen. Jer habt gar vil in eurem vorigen supplicirn begert: wer da gar vil darff begeren, dem wirtt zu letzt gar wenig eruolgt. Diß Jahr in Maio ist eine so grosse Teurung in Prag entstanden, daß man einen leib brott vmb (73 v ) ein halben Taller oder druber hat khauffen muesen, darüber vil hundert eine wochen Hungerßnoth, vnd daß darauß <eine> abscheuliche khrankheitten entstanden, gestorben sein, Welches alles gemäht hat, daß die 8000 leopoldischen rebellischen khriegßleith die stad Prag geplündert, der khonig Matthias < ein > vnd das khonigreich Behem mit iren großen khriegßvolkh die andern daselbst bekhriegt, vnd grosse praeparation auff die Behemische khronung des khonigs Matthias gangen ist. NB. Zu Prag ist einer Herrn Standts mit Namen Andre Hannibált gefankhnust worden, der bekhantte den 2. May dises 1611 Jahrs, daß Ferdinand erzherzog zu Grätz zum Romischen khonig vnd Ertzherzog Leopold zum Ungrischen vnd
