Feljegyzési könyv 1492-1543; A sorozat, 3. kötet - Sopron Város Történeti Forrásai (Sopron, 2006)
Das Gedenkbuch—A Feljegyzési könyv
item Ob sach wer, das mein hawswirt vnd mein tochter, Margaret, nit mechten sich miteinander betragen, So soll mein hawswirt Jr geben Von halbs haws wegen hundert phundt den. Oder mein Tochter soll Jm geben hundert gulden. item Meiner Tochter, Margareten, Zway gerichte pëtt mit aller Zugeherung. Auch ainen gerichten tisch Vnd drey Zynnschüssel vnd X Zynntällir Vnd ainen Khoph Vnd Zwen Silberlöffel vnd meiner pëssten rökh drey Vnd Ain Silberguertel, die fünff gulden wert ist nach der Versprechung meines frummen hawswirt, als ers dann weyss [79] item So ich mit Tod ab gee vnd mein Tochter versorgt oder verheyrat wirdt, So soll mein hawswirt Jeren taill Weingarten ann stat pawn das Ersst Jare. item So die Sophia lebt oder Zu Jeren Jaren khümbt, ain gerichts petth. item Von meiner Swesster, der Haydenjn wegen, die dann Jngehabt hat ainen geltbrieff, So red ich das aufF mein letzte hinfart, als ich Got soll antburdten am Jüngsten tag, das mein Swesster Jeren hawswirt peten hat, das er den priefF soll nir raihen. Also hat er Jn gesuecht vnd nit khünnen finden, darüber hat er geredt vnd versprochen, er weell Jn vertilung Oder so er gefunden wurd, soll er khain khrafft haben. item Jch pekhenn vnd Red, das mein hawswirt Trewlich geholfen hat, das ich pey meinem guet peliben pin. item Von des hawss wegen Jn der Newnnstat schaff ich Jm ganntzs frey vnd Ledig. item Jch beuilh meinem hawswirt vnd meiner Tochter, Margareten, auff Jr gewissen, als sy Got antburdten wellen an dem Jüngsten tag, mein seell. item Jch pit auch die Ersamen, Weysen Purgermeister, Richter vnd Rate Zu Odemburkh durch Gotswillen, das mein Letzter will volpracht werdt. Vnd darob Ze sein, das mein hawswirdt Vnd mein tochter, Margaretha, nach meinem Töd nit Jn Zwitracht vallen noch khomen. item Zu dem obbemelten geschëfft hab ich den geistlichen herrenn Jorgen Leinbater, Auch weltlich herren, herren Michelen Schottel, diezeit Purgermeister Vnd heren Jorgen Pawngartner, diezeit Richter, das Sy das gegenwirtig geschefft Verpetschafften sollen, die ich mit vleis darzu gépéten hab etc. Anno domini als vor Vermerkht den vertrag, bericht vnd Ainikeit. So durch die Ersamen, Weisen herrenn, besamentlich des Rats, Zwischenn des Erberen Wolfgang Osterberger an ainem, Vnd Junkhfrawen Margareten, seiner StewffTöchter des anderen tails, Vber das obgeschriben geschëfft Vnd letzten willen der Tugentsamen frawen Khunigunden seligen, obgedachter Margareten leiblichen Mueter Vnd Wolfgang Osterberger hawsfrawen beschehen ist. item Zum Erssten ist Jn beiden gesprochen das haws Jn der Stat, Jn Sannd Jorgen gassenn, Zwischen Gilig Zehenntners Vnd Liennhardt Steirer hewseren gelegenn, darauff ain dinst ist, I tal. den. Zu Sannd Michel, Yedem taill halbs. Welher taill aber Von dem anderen seinen taill ablosen welle, soll Jm geben Hundert phundt phenning Vnd nit mer. Ob aber beid taill dasselb hawss Taillen wollen, Alsdann soll die Junkhfraw die wall beuor habenn. Jdem Khants Wolfin hat dem Seydenikel vor den herrenn erlegt die Leczten L tal. den. vnd Seydenikel hat Sy denselben tag mit Jm wegk gefürt. Actum freitag nach Corporis Christi Anno .1.5.0.7.(06:04) [80]
