Első telekkönyv 1480-1553; A sorozat, 1. kötet - Sopron Város Történeti Forrásai (Sopron, 1993)
DAS GRUNDBUCH/A TELEKKÖNYV
Statt odenburg vmb Zway phundt vier schilling phening erkhaufft vnnd beZallt haben. Der gstallt, wo gemellts closster widerumb gestifft, auch brueder darjnnen wonen vnd ongeZaigts Weingarten begern würden, das allsdann derselb widerumb geschätzt vnd Jnen, den bruedern vollgen solle. Entgegen haben gemellte herren fur sich, Jr nachkhomen vnnd Gmaine Statt bewilligt, das sy möglichs vleiß darob sein wellen, damit vorgedachts Weingarten besitzern, vmb das sy Jne wider Zu paw gebracht, von denen, so Jne einnemen würden,ein Zimblichs Widerlegung beschehen solle, mit beileuffiger gwerschafft fur all rechtlich krieg vnd ansprach, nach Stattbrauch. Actum den .6. tag septembris Anno domini .1546. (09.06). Sub dominis magistratibus vt Supra etc. [155 r ] 815. Mert Frannckh, von Sanct Johanns auff der Haidt bei Hartperg, hatt fur sich vnnd seine erben nutz vnnd gwer emphanngen aines Mairhoff s Jn der potschagassen, Zwischen valltin weber vnd wilhalbm Bläßwetter, beder heuser daselbs gelegen, so Jme von weillennd seinem bruederen, Rueprecht Frannckhen, geweßnem burger Zu Odenburg, Jnnhallt seines darnach becrefftigten Testaments, frei, ledig geschafft worden, nach wellchs testaments Jnnhallt gedachter Mert Frannckh vnd sein erben sich ongeZaigts Mairhoffs vnd desselben Zuegehorung nun hinfuran wider ermellts Rueprecht Frannckhen erben vnnd sonnsten menigclichs Jrrung, rechtlich vnnderwinden vnd gebrauchen mögen, treulich vnd vngeuerlich. Actum den .22. septembris Anno domini .1546. (09.22). Sub dominis Magistratibus Joanne Reiß magistrociuium, Thoma preiß Judice. 816. Cristoff, weillenndt Hannsen prynner, Schneider, burger Zu Odenburg selign gelaßner Sune, hatt fur sich vnnd seine erben nutz vnd gwer emphanngen des halben Weingarten Jm Sachsgrunndt, Zwischen Erharten tZschun vnd weillenndt Fridrichen Lehers gelassen erben, beder Weingärten daselbs gelegen, so er von seinem bruedern, Casparn Prynner, Barbierer hanndtwerchs, vmb ain Suma gellts erkhaufft vnd beZallt hatt. Sollchs khauffs ist benennter verkhauffer gemellts seines brueders, Cristoffen vnd seiner erben rechter, trewer gewer, scherm vnd furstanndt fur all rechtlich khrieg vnnd ansprach gegen Cristen vnd Juden, nach Stattbrauch. Ernennter Caspar hatt auch ongeZaigten Weingarten fur frei, ledig auff- vnd vbergeben, doch mit vermelldung, das Zu herr Merten Golldners stifft darauff verpfenndt sein .10. tal.den., dauon Jerlich .4. sol.den. geZinst werden, so noch darauff bleibt. Actum den .5. tag nouembris Anno domini .1546.(21.05). Sub dominis magistratibus vt Supra. [155 v ] 817. Collman Schimel, burger Zu Odenburg, vnd Anna, sein eeliche hausFraw, haben fur sich vnd Jr beder erben nutz vnnd gwer emphanngen aines hauß Jn der potschagassen, Zwischen Georg fidlerin behausung daselbs vnd des Stainprunn gelegen, so sy von Georgen hänndtl vmb ain Suma gellts fur frei, ledig erkhaufft vnd beZallt haben. Sollchs khauffs ist benennter verkhauffer gemellts Schimel, seiner hausFrawen vnnd erben rechter, trewer gewer, scherm vnd furstanndt fur all rechtlich khrieg vnd ansprach gegen Cristen vnd Juden, nach Stattbrauch. Ernennter Georg Hänndtl hatt auch ongeZaigts hauß auf dem Rathauß fur frei, ledig auf- vnnd vbergeben. Actum den .5. tag nouembris Anno domini .1546.(11.05). Sub dominis Magistratibus Joanne Reiß magistrociuium, Thoma preiß Judice. 818. Sebastian Hauser, burger Zu Odenburg, vnd Petronella, sein eeliche hausFraw, haben fur sich vnd beder erben nutz vnd gwer emphanngen eines wisfleckh Jn den ätengräben bei dem deicht, so weillenndt Mert Sighart seliger Zu gmainer Statt geschafft, enhalb des pächl, do die Spitläckher an stössen, so sy von den herren Burgermaister, Richter vnd Rate gemellter Statt odenburg vmb ein Suma gellts fur frei, ledig erkhaufft vnd beZallt haben. Sollchs khauffs sein gedachte herren fur sich, Jr nachkhomen vnd gmaine Statt ernennts Sebastian Hauser, seiner hausFrawen vnd erben recht, trew gewern, scherm vnd furstanndt fur all rechtlich khrieg vnd ansprach gegen menigclich. Actum den .10. tag Decembris Anno et Sub dominis magistratibus vt proxime Supra (1546.12.10). [156 r ]
