D. Szakács Anita: 16-18. századi orvostörténeti vonatkozású végrendeletek; A kora újkori Sopron város egészségügyének társadalomtörténeti forrásai (Sopron, 2008)
Die Quellen/ Források
were, schaff ich solches meinem lieben bruedern Jona vnnd Schwestern Catharina zugleich. Bey der Perttingerin camrerin zu Prespurg ist in ainem ring ain grosser sophier versetzt, vmb acht taller den soll man lösen. Ain pecher jnwendig vnnd außwendig verguldt, ist der Christoff Schuesterin versezt per sechs taller den soll man lösen. Mein Hausfraw seillige hatt dem Hannß Distler barbierer zu Prespurg ain gannz silberne güerttl jnwendig vnnd außwendig verguldt sambt ainem güldenen ring mit zwifachem raiff darein geschriben, lieb mich also ich dich nit meher beger ich, mit zweyen stainen, ainen demuet, vnnd rubin, zuuersezen geliehen, welches bey gericht durch Ambrosien schon erledigt vnnd richtig gemacht worden, das muegen meine executores auch zuhanden bringen, darumben quitieren vnd meinen befreundten zustellen. Zu Lausitz hatt mir ain paur mit nahmen Florian geliehen zehen taller derwegen hab ich jme versezt zwen ring, ainen mit einem demant, den andern mit ainem vergiß mein nicht, mit ainer verschlossenen trew, daran hab ich ime bezallt, drey taller, die soll man auch lösen vnnd zuhanden bringen. Jttem dem Hannß Khop goldtschmidt zu Prespurg hab ich ettliche lott silber nach laut ainer verzeichnuß geben, daruon soll er machen ain duzet löffei, ain tollich beschlagen, vnnd ain manßgüerttl beschlagen, mer hab ich jme goldtschmidt geben drey stain ain rubin, sophier vnnd demant, darauß soll er machen drey ring vnnd ainen pisenkhnopff, darumben mein dienner Georg ain guettes wissen hatt. Jtten ain gladts khölchl becherl ist auch bey jme außzupuzen, jttem meher hab ich ime geben dreitzehen taller vnd vier schilling, dargegen hab ich von jme empfangen, ainen taller vnnd ainen ducaten, vmb solches alles sollen meine executores mit jme abraitten vnd zuhanden bringen. Jttem dem Anndre Haindl apoteckher bin ich schuldig worden vierzig taller daran hab ich jme bezallt, zwanzig taller. Dem Georg Moriz apoteckher bin ich vngeuar schuldig bey zwanzig taller. Ainem Schmidt zu Prespurg bin ich wegen roß beschlagen bey zweyen tallern schuldig. Meinem dienner Georg Suchanekh bin ich ettwas mehrers dan ain jars besoldung schuldig vnnd ain khlaidt, ist die jars besolldung zehen taller, wie in dem register buech zu sehen ist, ain edelman mit nahmen Türckh Frenz beim Graff Julio von Salm, ist mir ain guett roß schuldig, das schenckh ich gemeldten meinem dienner, samb dem böstem sattl, zaum stiffel vnnd sporn, auch ain par püchssen, ain tollich mit silber beschlagen, ain güerttl mit silber beschlagen, so beim golldtschmidt zu Prespurg ist, ain praun mendeckh, ain rotten macheyen dolman, zwey hembten vnnd meinen huet auch von der newen leinbat zu zweyen hembdern.
