Circulares literae dioecesanae anno 1914. ad clerum archidioecesis strigoniensis a Joanne Cardinale Csernoch principe primate regni Hungariae et archiepiscopo dimissae
XVI.
173 Nr. 5200. Obitus SS. D. N. Pii PP. X. Domina gentium, sancta scilicet Ecclesia Mater nostra, facta quasi vidua, magna in tristitia sedet: siquidem visibilis eius sponsus, Augustissimus Pontifex et Pater amantissimus felicis recordationis Pius Papa X expleta mortalitate, hesterna die nos orphanos reliquit, intravitque in gaudia Domini sui, ut laborum apostoli eorum praemia in perpetuas aeternitates reciperet ab eo, cuius vices summa cum gloria gessit in terris. In funere tam luctuoso, quis sit animorum moeror, facile intelligemus, si praeclara denati Pontificis opera in mentem revocaverimus. Pius Papa X ante suam ad sedem S. Petri exaltationem Josephus Sarto dictus, in oppido Riese apud Castrum Francorum die 2 Junii 1835 ex humilibus quidem, sed honestis parentibus ortum duxit. Bonam indolem natura dono acceptam custodivit, roboreque disciplinae auxit. Academicos gradus assecutus, sacerdotio initiatus est Patavii in dioecesano seminario die 18 Sept. 1858. Pluribus praefuit parochiis in ditione Veneta, usque annum 1875. pius, prudens, humilis, misericors. Tum canonicus, serius primicerius cathedralis Tarvisinae renuntiatus, semper perfectiori Cleri studuit institutioni. Die 10 Novembris 1884 Mantuanae Ecclesiae gubernacula suscepit; die 12 Junii 1893. p. m. Leonis Papae XIII perspicacissimam non valens in sua humilitate effugere considerationem, sacra purpura ornatus est, die autem 15 iisdem mense et anno, ad sedem patriarchalem Venetiarum promotus. Qui, dum sacrorum Antistitis munera sancte zelatus est pro Christi gregis portione sibi demandata, ecclesiasticam disciplinam enixe promovit, sacrarum caeremoniarum decori providit, Glregoriani cantus studiis maxime provehendis incubuit: in aposto- lico conclavi die 4 Augusti 1893 circa horam undecimam antemeridianam in Pastorum Principem, totius Christi gregis ducem et magistrum praeter omnium exspectationem invitus eligitur. Ad summi pontificatus fastigium sublimatus, adversa licet tempestate, nihil non molitus est, ut Ecclesiae utilitati et decori prospiceret atque omnia in Christo instauraret. Ut summatim recolantur quae universo orbi catholico comperta sunt, enitet prae primis denati Pontificis pietas, qua religionis incrementa curavit, decusque 26
