Circulares litterae dioecesanae anno 1896 ad clerum archidioecesis strigoniensis a Claudio Francisco Cardinale Vaszary principe primate regni Hungariae et archiepiscopo dimissae
XII.
108 PP. IX. humillimis precibus tum Vicarii Generalis, tum Generalis Procuratoris totius Ordinis Patrum Praedicatorum, benigne inclinatus, praevia confirmatione singularum indulgentiarum, quae per gloriosos Praedecessores suos tam sodalibus Confraternitatis sanctissimi Rosarii, quam universis Christifidelibus Rosarium recitantibus fuerant elargitae, ipsis sodalibus ceterisque fidelibus Rosarium recolentibus novas indulgentias clementer impertitus est: indulsit nempe, ut confratres et consorores cujuscumque Sodalitatis sanctissimi Rosarii tam canonice erectae quam in posterum canonice erigendae, qui aliquam ecclesiam in sequentibus festivitatibus: Conceptionis scilicet, Nativitatis, Annuntiationis, Visitationis, Purificationis, Praesentationis et Assumptionis B. M. V., itemque in duabus tantum Quadragesimae feriis sextis ad uniuscujusque libitum eligendis, necnon in Resurrectionis D. N. J. Ch. Dominica, in Ejusdem Ascensionis festo, ac in Dominica Pentecostes devote visitaverint, ibique per aliquod temporis spatium juxta mentem Sanctitatis Suae pias ad Deum preces effuderint, indulgentiam plenariam incipiendam a primis Vesperis usque ad occasum solis duodecim praedictorum dierum consequantur, dummodo iis diebus vere poenitentes confessi, sacraque Communione fuerint refecti. Decem vero annorum totidemque quadragenarum indulgentiam semel in die lucrifaciendam sodalibus aliisque Christifidelibus, qui corde saltem contrito tertiam Rosarii partem devote, sive domi, sive in ecclesiis, seu publicis vel privatis oratoriis conjunctim recitaverint, peramanter est elargitus. Iis tandem fidelibus, qui praefatam tertiam Rosarii partem ter saltem in qualibet hebdomada eodem modo recitare pro more habuerint, indulgentiam plenariam in ultima singulorum mensium Dominica acquirendam, si vere poenitentes, ut supra, confessi ac sacra Synaxi refecti, aliquam ecclesiam, seu publicum oratorium visitaverint, ibique juxta praememoratum finem per aliquod spatium temporis oraverint, benigne concessit. Voluit autem Eadem Sanctitas Sua, ut omnes et singulae praefatae indulgentiae non modo animabus in purgatorio existentibus applicabiles, sed etiam perpetuis futuris temporibus sint valiturae absque ulla Brevis expeditione. Contrariis quibuscumque non obstantibus. Datum Romae ex Secretaria Sacrae Congregationis Indulgentiarum die 12 Maii 1851. F. Card. ASQUINIUS, Praef. A. COLOMBO, Secret. Datum Strigonii, 9 Maii 1896. Claudius Card. AEppus.
