Circulares litterae dioecesanae anno 1887 ad clerum archi-dioecesis strigoniensis a Joanne Cardinale Simor principe primate regni Hungariae et archi-episcopo dimissae

XVIII.

137

XVIII.

DECRETUM

Romana beatificationis et canonizationis ven. servi Rei Vincentii Pallotti sacerdotis institutoris Piae societatis missionum.

SUPER DUBIO

An sit signanda Commissio Introductionis Causae in casu, et ad effectum de quo agitur ?

Eximios inter operarios, quos providentissimus Deus hac nostra aetate ad mysticum Ecclesiae suae agrum excolendum misit, conspicuum sane locum tenuit Sacerdos romanus Vincentius Pallotti piae Societatis presbyterorum sacrarum Missionum Fundator. Hic enim Dei Servus proclivem ad pietatem sortitus indolem, iam inde a pueritia praeclarae sanctimoniae specimen exhibuit. Sacerdotio dein insignitus, quo alacrior ad apostolicum ministerium obeundum accederet, terrenis bonis posthabitis, ad animi sui culturam et profectum in christianis virtutibus totum se contulit. Hinc ardor ille divinus erupit, quo exaestuans a proximorum salute provehenda, etsi annis iam maturus, nunquam destitit. Pauperum proinde gregem excolere in deliciis habuit, sacros iuvenum, qui in Ecclesiae spem adolescunt, coetus, ut ad omnem virtutem componeret, plurimum adlaboravit, artificum collegia ad pietatem vehementer accendit, militumque valetudinaria in virtutis palaestram convertit. Et quo magis animabus iuvandis consuleret, sibi socios adiunxit, qui regnum Christi ubique dilatare studerent. Fractus tandem laboribus pro animarum bono admirabili zelo susceptis, insignibus a Deo cumulatus charismatibus, iustorum mortem oppetiit die XXII Ianuarii anno MDCCCL, magnam sanctitatis relinquens famam. Quae sanctitatis fama quum latius splendidiusque post eius obitum, supervenientibus, uti ferebatur, prodigiis, percrebuisset, deventum est Romae ad Inquisitionem, auctoritate ordinaria, super fama Sanctitatis vitae, Virtutum et Miraculorum. Hac autem rite expleta, quum a Sanctissimo Domino Nostro Leone Papa XIII per decretum Sacrae Rituum Congregationis sub die V Septembris MDCCCLXXIX indultum fuisset, ut de Dubio signaturae Commissionis Introductionis Causae praefati Servi Dei agi posset in eadem Sacrorum Rituum Congregatione ordinaria, absque voto et interventu Consultorum, Emus et Rmus Dnus Cardinalis Raphael Monaco La Valletta, Episcopus Albanensis, huiusce Causae Relator, ad instantiam Rev. Dni Caroli Mariae Orlandi Sacerdotis piae Societatis Missionum, Postulatoris Causae ipsius, attentis postulatoriis litteris

Nr. 5606.

E S. Rituum Congregatione.