Circulares litterae dioecesanae anno 1880 ad clerum archi-dioecesis strigoniensis a Joanne Cardinale Simor principe primate regni Hungariae et archi-episcopo dimissae
XII.
65 XII. In Parmensi Seminario erecta est Academia S. Thomae Aquinatis, ad cujus Praesidium et Socios Beatissimus Pater responsi instar sequens dirigere dignatus est apostolicum et plenum sapientiae Rescriptum : LEO P. P. XIII. Dilecti Filii, salutem et apostolicam benedictionem. Dum vitiatae tribus ab hinc saeculis philosophiae consectaria deploramus, quae sensim ceteris disciplinis irrepentia et ad ipsum vitae usum traducta, errorum flatu partisque perturbationibus Societatem in qua vivimus iactant et ad dissolutionem compellunt, gratulamur vobis, Dilecti Filii, quod adeo alacriter coiveritis ad ea restituenda principia, quae et religioni vindicandae, et retundendis sophismatum iaculis ac insidiis, et illustrandae veritati, et per haec moderandis moribus ordinique reparando sola possunt efficacem operam conferre. Ducem profecto ad tantum opus tutiorem illo nequebatis eligere, cui sanctitas eximia cum ingenii vi et perspicuitate humanum excedente modum coniuncta Angelici Doctoris laudem comparavit. Qua in re, praeter indolem ipsam incepti vestrumque studium, illud maxime Nos delectat, statuisse vos, ab eo tantum fonte sapientiae documenta depromere, quem Nos aperte designavimus ; nunquam vero a rivis, qui non salubribus aquis creverunt, quamvis ab ipso fluxisse dicantur. Cum enim haud pauci occurrant, qui dum Aquinatis mentem callide conantur ad propriam detorquere sententiam, vel hanc ita componere student eaque illinere fuco qui non absimilem illius placito speciem referre videatur, eoque apparatu obducti, se sancti Doctoris, a cuius doctrina toto coelo aberrant, discipulos iactant ; perspicacia vestra voluntatisque firmitas Nobis argumento est, vos non modo fraudibus huiusmodi deceptum non iri, sed ita detecturos illas esse, ut alios quoque a periculo deceptionis arceatis. Ominamur itaque vobis ut alii atque alii conventui vestro dent nomen, quo, iunctis multorum viribus et opera citius, facilius, pleniusque spectatum finem in religiosae civilisque rei commodum assequamini. Sit autem vobis auspex divini favoris Nostraeque paternae benevolentiae testis apostolica benedictio, quam vobis singulis, dilecti Filii, et Academiae vestrae toti peramanter impertimus. Datum Romae apud S. Petrum die 21 iunii an. 1880, Pontificatus Nostri anno tertio. LEO PP. XIII. Dilectis Filiis Praesidi et Sodalibus Academiae Sancti Thomae in Parmensi Seminario erectae PARMAM. Strigonii, die 27-a Junii 1880. Rssimus D. Antonius Sujánszky, Praepositus, E. M. S. Canonicus, — Archi- Diaconus Neogradiensis et Collegii Pazmaniani Rector bis mille florenos in chartis aerarialibus perpetuae fundationis instar deposuit eo fine, ut census exinde redundan-' tes converterentur pro asservanda peculiari devotione sub Octava Festi SS. Cordis Jesu in parochiali Ecclesia Civitatis Archi-Episcopalis Strigoniensis. — Devotio ipsa Nr. 2901. Breve Apostolicum ad Praepositos neoerectae in Seminario Parmensi aca- demiae s. Thomae directum. Nr. 2902. Fundatio pro asservanda devotione sub Octava Festi SS. Cordis Jesu.
