Circulares litterae dioecesanae anno 1877 ad clerum archi-dioecesis strigoniensis a Joanne Cardinale Simor principe primate regni Hungariae et archi-episcopo dimissae
XVI.
121 Ecclesia Catholica disquisitiones philosophicas, dummodo illae sanae sint, tantum abest ut prohibeat ac reprobet, ut potius studia, in hunc finem impensa merita laude prosequatur. Quod vel ex subnexis SSmi Domini Nostri litteris patet, quorum tenor sequens est: „Dilecto filio nobili viro Baroni Nicolao Taccone Gallucci. — Miletum in Calabria. Pius PP. IX. Dilecte fili nobilis vir, salutem et apostolicam benedictionem. — Philosophicam tibi, dilecte fili, nobilis vir, instituenti disquisitionem in obieetam sensui pulchritudinem e creatis rebus emicantem, necessario perveniendum erat ad ipsum pulchritudinis fontem et speciei generatorem, qui cognoscibiliter in creaturis videri potest. Gaudemus idcirco, te, sicuti in Verbo supremam pulchritudinis rationem constituisti, sic in eodem humanae iuncto naturae speciosoque forma prae filiis hominum propriam designasse rationem eminentiae, ad quam artes christianae fuerunt avectae. Scilicet ipsae visum intendentes in oblatum iam sensibus, perfectissimum omnis pulchritudinis typum, coniungere tandem potuerunt elegantiam formae a Graecis praestantissime excultam, cum iis quae de Deo eiusque operibus a viris divino spiritu afflatis sublimiter tradita didicerant; et haec eatenus seiuncta, copulando, ad illam assurgere perfectionem, quae animos, magis etiam quam oculos, in admirationem rapit. Gratulamur autem, te impio Dei odio gliscentique naturalismi pesti lucubrationem opposuisse tuam, ut rationis etiam argumentis pateat, quam vani sint illi, qui scientia Dei carentes, de his quae videntur bona, nesciunt intelligere eum, qui est, neque operibus attendentes agnoscunt, quis sit Artifex. Quamquam igitur versare potius aliquantulum, quam legere oblatum a te volumen potuerimus, de ipso ac de demissis obsequii studiique tui officiis gratum tibi profitemur animum ; atque ominamur, ut vires ingenii operositatemque tuam constanter, ut hactenus, impendere pergas profligandis erroribus illustrandaeque veritati. Supremam idcirco tibi adprecamur opem et gratiam, earumque auspicem et paternae Nostrae benevolentiae testem tibi, dilecte fili nobilis vir, apostolicam benedictionem peramanter impertimus. Datum Romae apud S. Petrum, die 27 augusti 1877, Pontificatus nostri anno tricesimo secundo. Pius PP. IX.“ Strigonii, die 14-a Octobris, 1877. Beneficium parochiale in Farnad, juri Patronatus mei obnoxium, Joanni Szila- veczky, Parocho hucdum Jászfalvensi a me collatum fuisse cum eo ad notitiam Vestram perfero, ut qui taliter canonice vacantem parochiam in Jászfalu obtinere desiderant, recursus suos usque 30-am Novembris, a. lab., tamquam terminum praeclusi concursus, pro eadem hisce exscripti, horsum exhibeant. Strigonii, die 14-a Octobris, 1877. Ecclesia disquisitiones philosophicas non prohibet. Nr. 4604. i Nr. 4605. Concursus pro vacante parochia in Jászfalu.
