Circulares litterae dioecesanae anno 1872. ad clerum archi-dioecesis strigoniensis dimissae a principe primate regni Hungariae et archi-episcopo Joanne Simor

XX.

dis Apostolicae in casu? Et quatenus negative: 2. an contraria praxis ubi introduci vellet, vel jam esset introducta, declaranda sit abusus et directe opposita legibus Ecclesiae; ita ut per Episcopum sit abscindenda? Sacr. eadem Congregatio, audito prius voto unius ex Apostolicarum caerimoniarum Magistris, scriptis exarato typisque vulgato, ad relationem Emin. et Rev. Domini Cardin. Vicecomitis, rescribendum censuit:

Ad 1. „Non licere“,

Ad 2. „Contrariam consuetudinem declarandam esse abusum, et Episcopus curet abscindi.“ Et ita declaravit, ac servari mandavit. Die 18. Sept. 1781.

Regula secunda est: Nullo modo licet in nocte Nativitatis Domini post cantatam primam Missam alias duas immediate celebrare, ac ideo Sacerdos, qui in dicta nocte celebravit Missam cantatam sive solemnem, non potest immediate celebrare privatim aliam, secundam nempe Missam, aut hanc secundam et tertiam, sed tenetur expectare auroram. Quod S. R. C. iteratis vicibus declaravit, ut liquet ex decretis:

a) Pisauren, Patres S. Caroli Congregationis Clericorum Regularium petierunt responderi; an liceat in nocte Nativitatis Domini post cantatam primam Missam, alias duas immediate celebrare et communicare fideles? Et S. C. respondit; „nullo modo licere, sed omnino prohibendum.“ Die 20. Aprilis 1641. b) Bisuntin. Praeter alia dubia proposita in S. R. C. Episcopus Bisuntinus supplicavit infrascripta dubia declarari: 2. „An Sacerdos qui in dicta nocte celebravit Missam solemnem, possit immediate celebrare privatim reliquas duas Missas, vel potius teneatur expectare auroram.“ Et S. eadem Congregatio respondit: „Negative“, cum id et allegatis rationibus abunde probetur, et praxi universalis Ecclesiae conformi Romanae Magistrae comprobetur. Die 11. Novembr. 1676. c) Tauri- nen. Archi-presbyter et Canonici Ecclesiae Collegiatae Oppidi Chierii Taurinensis Dioecesis pro declaratione infrascripti dubii humillime suplicaverunt: „An post Missam solemnem decantatam in nocte Nativitatis D. N. J. C. liceat successive celebrare Missas privatas, nec non Sacram Eucharistiam Christi fidelibus illam deposcentibus exhibere?“ S. R. C. juxta alia decreta respondit: „Negative.“ Et ita declaravit. Die 3. Decembr. 1701. Regula haec in Directorio quoque Dioecesano proposita legitur his verbis: „Nulli licet post decantatam primam Missam successive alias duas ante auroram celebrare.“

Hae declarationes conformes omnino sunt rubricae Missalis praeceptivae, quae de hora celebrandi Missam sic statuit: „Missa privata saltem post Matutinum et Laudes quacumque hora ab aurora usque ad meridiem dici potest, a qua rubrica quoad Missas privatas nec in Nocte Nativitatis D. N. J. C. recedere licet.

Regula tertia est, quae hoc S. R. C. decreto die 22. Novembr. 1681. edito in Lucan. exprimitur: „S. R. C. inhaerendo aliis resolutionibus circa celebrationem trium Missarum in Nocte Natalis Domini, alias editis, et signanter sub die 7. Decembris 1641. iterum declaravit: „Non esse permittendum usum introductum a nonnullis Canonicis et Presbyteris Ecclesiae Cathedralis Lucanae, celebrandi tres Missas privatas immediate post decantatam Missam solemnem in Nocte Natalis Domini, sed omnino prohibendum.“

Strigonii, die 3-a Decembris, 1872.

Joannes m. p* Archi-Episcopus.