Circulares litterae dioecesanae anno 1869. ad clerum archi-dioecesis strigoniensis dimissae a principe primate regni Hungariae et archi-episcopo Joanne Simor
Nr. I.
CIRCULATES DIOECESANAE. Nr. I. Venerabiles Fratres et Filii in Christo Dilectissimi! Salutanti milii Vos in exordio anni, qui paucos aute dies nobis illuxit, ante omnia occurrit S. Mater Ecclesia Catholica, diffusa per orbem, sed non divisa, dilatatione numerosa, sed confessione una, quam anno etiam mox elapso tot minarum ventis, tot tempestatum fluctibus agitatam vidimus, ut inter aerumnarum praeteritarum recordationem, praesentium sensum et futurarum metum non possimus non ingemiscere. Itaque ad obtinendam Domini misericordiam tota mentis nostrae dirigatur oratio : ut Ecclesia dispulsis erroribus, prostratisque, imo conversis ad frugem hostibus, sic bonis omnibus repleatur, ut in nobis potens facta pro nobis, et redimat, quos requirit, et custodiat, quos redemit. Occurrit dein Summus Pontifex vere Pius, vere Sanctissimus. Deum, cujus vice in terris fungitur, rogare obtestarique pergamus, ut Pium IX. apostolicae Sedis dignitati, religionis praesidio, rei christianae incremento, meliorumque temporum felicitati quam diutissime servet ac tueatur. Experiatur, quod omnes Apostolorum Principis Successores experti sunt, Ecclesiam oppugnari, sed non expugnari, hostes adversus illam certare, sed non vincere, bellare sed non praevalere. Videat Beatissimus Pater grandis sui moliminis, indicti pro immortali nominis sui gloria Concilii Oecumenici laetum ac felicem exitum, carpatque saluberrimos tanti operis fructus in pace Ecclesiae reddita, in obsequio, tranquillitate et diuturna prosperitate populorum. Occurritis mihi denique Vos, gaudium et corona mea, Fratres et Filii in Christo dilectissimi! Sit Ecclesia Catholica in Vobis Sacerdotibus gloriosa, sit in Vobis suis ministris sancta, in ministeriis vestris illibata. Sciatis, quod Deus elegerit Vos in honore quidem, sed etiam sollicitos in labore. Aedificetis ergo in ejus Vinea, plantetis, eradicetis. Luceat lux vestra in excelso virtutum, luceat in observantia mandatorum Dei et Ecclesiae. Luceat in pastorali munere; luceat in spendore dignitatis; luceat in custodia animarum; luceat in moribus, luceat in exemplo, luceat in religione; luceat in templis; luceat in curae vestrae creditis populis; luceat coram hominibus, ut videant opera vestra bona, et glorificent Patrem nostrum, qui in coelis est. Haec sunt Patris ac Praesulis vestri vota, quae ut effectu compleantur, assiduis Deum ac Dominum nostrum Jesum Christum precibus deprecari non desinam. Gratia Domini nostri Jesu Christi cum spiritu vestro. Arnen. Datum Strigonii, in Epiphania D. N. J. C. 6. Januarii, 1869. Nr. 215. Archi-Epiaco pi vota. 1