Zsinka Ferenc szerk.: Magyar protestáns egyháztörténeti adattár. XI. Budapest 1927.
94. sz. Miskolczi Csulyak István Diarium-ából. - 1. Miskolczi Csulyak István önéletrajza
Anno 1609. 21. Januarii patrono sepulto, ego quoque sensim male cepi habere, cum integro mense phrenesis ita debilitasset ut fere animam agerem. Interea dies generalis synodi, quo inaugurandus forem 18. Febr. Szerencini supervenit : cumque omnibus fere viribus exhaustus essem, finita iam disputatione, ad mandátum domini Senioris conseniorumque, ego a rectore Zomborinensi et Szerencinensi suffultus synodo ingressus sum nonnisi ad impositionem manus. Competitores habui quatuor, Emericum Rosos Kecskeméti ordinatum Cassoviam, Martinum Giarmati ad Basko, Michaelem Szent Margitai Dobszam, et Michaelem Nameni Cassa Uyfalum. Nondum convalueram cum dies nuptiis quoque meis sacer advenit 25. Februarii : et licet vix vires suppetebant assidendi mensae : nihilominus in aedibus parochiae Zomboriensis nuptias cum Juditha celebravi, quam postea ego intra anni et quod excurrit spatium vernaculam legere scripturam exactissime docueram. Hunc vero annum tranquilla clausit morte Stephanus Szentandrasius Tarczalini, cui in Senioratu Szantoviae successit Georgius Tardi, quem inauguravit Andreas Ungvári pastor et senior ecclesiae Miscolcinensis, in qua synodo disputatutn est de Baptismo in specie ; hic ego respondentis functus sum munere. Anno 1610. Tholtsvenses per literas ad functionem ecclesiasticam 4. Maji invitarunt: quas Michael Szent Péteri praefectus, tamdiu apud se detinuit, donec alumnum suum Petrum Beszermeni mihi supplantasset ; qui licet inviderit fortunam meam, nihilominus deo propitio livor ille adeo honores meos obnubilare nequiverit, ut potius ad maiora contendendi januam mihi aperuerit. Nam eiusdem adhuc mensis 28. Maji Thokaienses quoque ad munus Pastorale invitarunt. Anno 1611. Ivditha mea primogenitam sui cognominem 30. januarii die dominico ante contionem matutinam hora 7. enixa est, quae postea 17. Martii post purificationem suam templum fuit ingressa. Eodem anno conjunx tribus fere hebdomadibus, mense Septembri ita gravi morbo detenta fuit, ut nullam penitus de sanitate recipienda spem haberem : et hoc conjugalis calamitatis primordium, docere me occepit, scholam esse conjugium : verum Dominus lacrymarum et suspiriorum meorum misertus, 23. septembris praesente Johanne Chuliak fratre, et audire et loqui et videre cepit. Haec mea conjunx erat dives virtutum foeminearum, maxime vero pudicitia supra quam dici potest ita splenduit, ut fere in Vitium degene-