Barabás Samu: A római szent birodalmi gróf széki Teleki család oklevéltára. I. 1206–1437. (Budapest, 1895.)

— 165 — bus accessissent, iuxta seriem et continentiam predictarum literarum ipsius domini Nicolai voyvode per metas antiquas eiusdem possessionis Lona reambulassent et in locis necessariis novas metas erexissent. Quarum quidem predictarum antiquarum et renovatarum ac novarum metarum, prout iidem vester et noster homines dixerunt, cursus talis est: quod primo ex plaga septemtrionali iuxta fluvium Lona vocatum in dicto monticulo Zazholm duas terreas metas magnas capitales reperissent, penes quas tres novas metas, quarum una a predicta plaga septemtrionali possessioni Inakhaza et alia possessioni Bunchyda, tertia vero possessioni Lona a parte occidentis separantes erexissent, inde versus possessionem Walazwth paululum procedendo unam metam de novo erexissent, inde ascendendo ad unam aciem, in qua longe eundo directe perveniret ad unum or, ubi iungeret duas metas, quarum unam renovassent, abhinc descendendo ad unum siccum pathak et pertranseundo ipsum ascenderet iterato et eundo perveniret ad unum monticulum, in quo unam metam terream invenissent, penes quam aliam novam metam perfodissent, abhinc versus plagam meridionalem declinando circa quandam virgultam Harazth nuncupatam ad duas metas antiquas pervenissent, quarum unam renovassent, abhinc eundo in eodem colle, in fine dicte virgulte perveniret ad unam metam, penes quam aliam novam metam erexissent, inde reflectitur versus meridiem et descendendo iungeret unam metam, deinde ad unum pathak Pascaaya vocatum, secus quod esset una meta terrea, ubi saliret ipsum pathak et ad eandem plagam ascenderet ad unum berch, in cuius cacumine duas metas antiquas invenissent, ubi reflectitur versus occidentem et eundo directe veniret ad unum holm, ubi essent due mete antique, inde in colle curreret ad alium holm, in quo esset una meta, inde in eodem colle currendo perveniret ad tres monticulos Harumholm vocatos, super quorum tertio finali unam metam reperissent, iuxta quam aliam novam metam erexissent; et sic terminarentur cursus predictarum metarum litigiosarum, et nullus ex commetaneis vei vicinis tam in reambulatione, quam novarum metarum erectione exstitisset eisdem nobilibus de Lona contradictor.