Fejér, Georgius: Codex diplomaticus Hungariae ecclesiasticus ac civilis. Prodromus. (Budae, 1829.)

VIII. Vtilitatis non minus, ac praesidii accedit e Diplomatibus iuri Ciuitatum cum publico tum priuato, ecclesiastico ac ciuili; vt quo plus in diplomatum cuiusuis ciuitatis studio profecit aliquis, eo accuratius nouerit iuris utriusque capita intelligere feliciusque applicare. Quae in leges regni apud Gentiles nostros inualuerunt, ea in Regum, Iudicumque formis ac consuetudinibus viguisse, paginae illae demonstrant; iusque, quod Patronatus vocant Regum, atque aliorum, contestantur; priuilegia Statuum et Ordinum, libertates ciuium et hospitum inde hauriuntur; ut non commemorem titulos, queis praedia, possessiones , magistratus, dignitatesve aliae tenentur, aut repetuntur. Iisdem illustrantur obscura, expediuntur controuersa, affirmantur incerta; refelluntur commentitia, explicantur intricata. Dicam verbo: sunt Iurisprudentiae puppis et prora. IX. Chartarum talium ope, cum infinita fere oppidorum, villarum, possessionum, praediorum, castrorum contineant vocabula, egregie ilJustratur aeui antiqui Geographia, et Statistica quoque; si eis in consilium vocatis vetera cumhodiernis conferantur; suis singula Parochiis, conuentibus, quos iam Comitatus dicimus, assignentur. Quod ad desiderata Hungarica mcrito retuleris: ignoramus enim hucdum,