A Győri Püspökség Körlevelei, 1896
Tartalomjegyzék
1 Nr. I. Venerabiles Fratres et Filii in Christo Dilectissimi! In nomine Sanctissimae Trinitatis et indivisae Unitatis, Patris et Filii et Spiritus Sancti inchoavimus novum annum, imo secundum millennium gentis nostrae. Quo gressus peregrinationis nostrae a semita mandatorum Dei non devient, inflammavimus fidem nostram professione ejus publica, ut sit illa viva, ut in ejus, tamquam columnae igneae, lumine ambulemus ; ut ad sananda vulnera, reparandaque damna Ecclesiae Jesu Christi — eheu in patria nostra ! — novissimo tempore illata, nostra alacriter procedant eloquia, dirigantur cogitationes et opera. Invocavimus porro patrocinium B. Mariae Virginis, magnae nostrae Dominae, ut impetret nobis animi fortitudinem in minacibus vitae periculis, ut »in mari irato et in rapida procella Ipsa sit nostra benigna stella !« Hoc provisi viatico, hoc muniti praesidio tuti jam procedamus in pace ! Primum, quod in capite novi anni Vobis significo, est memoria meae quondam in Presbyterum ordinationis. Laeto gratoque in Deum animo annuntio Vobis, Dilectissimi, me die 15-a currentis mensis Januarii — Deo propitio — sacerdotii mei semisaeculum complere, et quinquagesimum anniversarium primi, quod obtuli, sacri Missae sacrificii die 19-a istius mensis, festo sanctissimi Nominis Jesu, esse recoliturum. Deus, qui laetificavit juventutem ad altare suum introeuntis, etiam senectuti meae concessit quaedam gaudia. Quod quidem gaudium eo majus, et in hoc perfectius est, quod illud non unice meum, verum, bene noscens Vestrum in me studium, incunctanter asserere sustineo, nostrum dici poterit. Si corpore adesse prohibebunt Vos pastorales in hac festivitate functiones : spiritu certo aderitis tum Vos, tum fidelis noster mihique charis- simus populus. Aderitis spiritu omnes, dum eucharisticum sacrificium offeram Deo vivo et vero. Aderitis, et diem hanc, quae mihi Antistiti Vestro magna est, etiam Vos socia exultatione concelebrabitisBenedicat anima mea Domino, et omnia, quae intra me sunt, nomini sancto ejus ; quia bonus, quia in saeculum misericordia ejus ! Annuntiate haec, Dilectissimi, ex ambone fideli populo, et festo sanctissimi Nominis Jesu perlegatis meam ad fideles datam pastoralem epistolam, tum eam, quam Vobis et illis e paterni cordis pleno affectu mitto, benedictionem. Orate, Dilectissimi, pro me, sicut ego Vestri in orationibus meis memor ero. Jaurini, die 4-a Januarii 1896. Nr. 50. Episcopi jubilaeum sacerdotale.
