VJESNIK 11. (ZAGREB, 1945.)
Strana - 246
246 VJESNIK HRVATSKOG DRŽAVNOG ARHIVA Iz kotere Moslovčanov tvrdokornosti med nekoterimi poglavitemi i vrednemi ljudmi neprijatelstvo i velika spisavanja i tužbe izešle su z velikum i kraljevskoga Dvora i vsega orsaga neprilikum. 6. aprilisa predugo i nigdar nečujeno tulikoga terminuša orsačko spravihče vu Zagrebu je se pričelo, ar prez znanja i privolenja kraljevskoga Dvora dokončati slobodno ne ga bilo, zato do Martinja tulikaj je trpelo. Vu ovom dugom spravihču več bilo je deputacij za ispunjenje budi dokončaneh vu lajnske zagrebačke kraljevske komisije po kraljice potvrgjeneh, budi noveh kraljevskeh zapovedi. I kajti gospon viceban Januš Rauch svoje vse časti bil bi izručil iliti rezignuval hotejuči sebe vu mir i pokoj postaviti, zato pod ovem spravihču gospodin ban imenuval je za vicebana gna Adam Najšića, prvo horvatckoga meštra. Na kojega mesto mešter bansko-orsački izebran je po gospode zmed drugeh gospon Peter Škrlec od Lomnice, vugerskoga vu Beču kancelariuša gdina grofa Leopolda de Nadasd sekretar. Ovum prilikum razdružena je čast supremus komeša varmegjij zagrebečke i križevečke, koja prvo ter od negda skup z vicebanijum išla je, ar kraljica varmegje križevečke supremus komeša postavila je grofa Jozef Kazimira generala Draskovic od Trakoštanja, zagrebečke pako varmegje supremus komeš postal je gospon Januš Juršić, tabule judiciarske prvo ašešor, kojega ašešoriju zadobil je gospon Laslov Lukavski. 53 Zapovedano tulikajše je bilo ispisati način ravnanja, kako nove varmegje ravnati bi se morale. Koja duguvanja vnoge misli zavdale su, ar negdašnje horvatckoga orsaga ravnanje vse preobrnjeno videlo se je i novi način dopeljan. Ban horvatski Karol de Batthyan osebujnu relikviju od jezika sv. Ivana Nepomucenskoga stolne zagrebečke cirkve poslal i prikazal je, kotera 16. dan majuša po gospodinu biskupu Ferenc Thauszy s osebujnum procesijum redovnikov, ljuctva i puka, nego i poglavite. gospode, zbog spravihča vu Zagrebu prebivajuče, vu stolnu sv. Štefana cirkvu je postavlena, i kanovnik i opat, skupa i prepust začesanski Ivan Paxi 54 prodečtvo od vseh hvaleno imal je. Z pričetka meseca juliuša povrnuvši se iz Beča g. mešter Peter Škrlec list orsagu donesel je, vu kojem ban horvatcki grof Karol Batthyan orsagu obznanuje, da bansku čast bil bi izručil, i orsagu hvali na svojem trplenju i svoje pri Dvoru službe nadalje alduje. List ov občinsku zavdal je žalost, tak zbog zgublenoga bana, koji orsag ov osebujno i očinsko je ljubil, kakoti i zbog straha, da kotera orsagu nepovolna ne izgode se. Zaisto da ban Karol Batthyani vekivečnoga zaslužil je od Horvatov spomenka, ar zvan toga, da vu velikeh bil je častih i zmožnosti, zvan da kraljevski minister i vu kraljevskom pri Korune hercegu Jožefu Dvoru, vnoga ravnanjem njegovim i pod njim vučinena su, kakoti 1. podignene vu dolne Sklavonije sremska, verovitička i požegska varmegja, 2. Krajin banskeh na soldačtvo izdignenje, po kojem obodvojem duguvanju priliku službe, plače, časti, preštimanja vnogem domovine sinom dal je, 3. Petrine pod orsag zadoblenje, 4. polovicu dohotkov harmic, od negda prošeneh i čakaneh, on dobil je, 5. Imajn morskeh, negda Frangepanianskeh, pod orsaga i varmegjinsku oblast spravlenje, 6. putov popravlanje, 7. trštva dopeljanje i druga ostala vnoga kako skrblivoga za občinsko dobro bana Batthyanja svedoče, tako vekivečno spomenka potrebuju. Po glasu zručenja njegove banije poslan imenom občinskem vu Beč bil je baron Ištvan Patačić, da za skrb imanu zhvali Batthyianju, občinsku nazvesti žalost i vu očinsku njegovu ljubav i skrb nadalje orsag preporuči. Okolu Bartolova nazad Patačić je se povrnul i poleg zapovedi prijete vu Moslovinu taki imenom komisara odišel, da skup spravleno pri kapele svetoga Juraja ljuctvo posluhnul bi i, ako bi bilo moguće, vumiril. Kade mesec dan vu gradu Moslovine zadržavajući se i nikaj ne opravivši okol Miholja povrnul se je. Ovo leto odprto neprijatelstvo i tabori počeli su med Anglijanci i Francuzi, kakoti i vugerskum kraljicum i kraljem Borusije. Zato poklakam kraljevske vu Bohemije armade bil bi prepostavlen marešal general Braun, 55 druge pako pri Moravije general Piccolomini, 56 po zapovedi kraljevske 12. dan juliuša iz Zagreba vu armadu odišli su oberstar grof Krištof Oršić i oberstleitinant Miklouš Grlečić, kapitani Miklouš Matleković, Rožička, Tolnaj i drugi oficeri i z ovemi šereg 2200 soldatov jak, koteri pri Lobosicu 1. dan oktobra ovo isto leto i boja pričeli su. Čez malo za ovemi oberstar konjički g. Gabor Škrlec svojemi 500 konjaniki je odišel i grof oberstleytinant Peter Sermage. 53 Do sada procurator fiscalis episcopalis Posegae. 54 Ivan Pakši (Pascy), kasnije biskup srijemski. 55 Grof Uliks Maksimilijan Braun ili Browne, maršal. 56 Princ Oktavij Piccolomini, general maršal.
