VJESNIK 6. (ZAGREB, 1931.)
Strana - 76
76 212. 1774. 15. maja. U Cvetkovićima. Petar Dikšić zalaže jednu sjenokošu Josipu Tandariću. My Peter Borkovich, kotara y obchine czvetkovechke suppan, Mihail Dimjakovich, fiscus, Peter Battusich, sztaressina, osztali priszesni assessori y veche obchinszkeh lyudi po ovom nassem odpertom pyszmu vszem i vszakomu, kojem sze prisztoja, na znanye dajemo y isztinszko valujemo, kako vu litu sada po narogyenyu Krisztusevom tekuchem 1774. dan 15ti meszecza rosnyaka aliti majussa szuszed y brat nass obchinszki Peter Dixich nazochi vu persone z szvojem sivem glaszom odperto valuval je, kako vu naimre ovo do szada vu vremenu okolu dvadeszeteh leth od postuvanoga Josepha Tandaricha, drugach pod pred Szamobor podlosnika vu dobroi y po orszagu lahko tekuche szreberne fele penez rainchkov szto y jedanaiszt, id est florenos rhenenses 111 vu poszudbeno ime zdigel bijasse y zato recheni Dixich szvoju sztanovitu sztarinszku drugich ovdi vu kotaru czvetkovichkom prisztojalischu Okicha y Keresztincza gradov ter vu zagrebachkoi gradszkoi megye buduchu y med mejassi od izhoda szunchenoga germjem obchinszkem y Mathiassa Funeticha szinokossom, od pol dan, zahoda szunchenoga y od szevera Mikule y Petra Koszekovicha szinokossom zevszema lesechu szinokossu szpomenutomu Josephu Thandarichu bil je vu žalosno ime pusztil dersati. Ali kaiti recheni Tandarich na takovu szinokossu nikakove do szada pravicze niti tverdnoga pyszma ni imal, odkuda tak kupecz kako takai y prodavecz nasz dosztoino proszisse, da bi nym ov žalosni valas vuchiniti y napiszati dopuztili, kojeh my dosztoinu prosnyu y pravichnu potrebochu videchi ov iszti valas žalosni napiszati y szpomenutomu Tandarichu za nyegovu vu napridak szegurnoszt dati dopusztili jeszmo. Otkuda ni samo Joseph Tandarich y nyegova bratja nego takai nyh vszeh obojega szpola osztanak takovu szinokossu mirno odszada ladati, vusivati y haszen iz nye vuzimali budu sze do teh dob doklam on Dixich Peter ali nyegov osztanek gore spomenutu summu poverne y nazad polosi. Kotere summe rainchkov naime 111 drugda nigdar ne bude moglo biti nego vszigdar na dan szvetoga Jurja viteza povrachenye y polosenyie. Z verhu chesza my gore spomenuti suppan y osztali priszesni assessori oprosziszmo gospodina Ladislava Franetyaka, da bi ov valas žalosni na piszmo posztavili y szpomenutoum Josephu Tandarichu za nyegovu y njegoveh vszeh obojega szpola poszlednikov szegurnost van dal, kako y vuchinyeno bijasse.
