VJESNIK 1. (ZAGREB, 1925.)

Strana - 106

106 bene affecti, sed perquam maxime rex, reliquique proceres. Omnes nocte dieque rebus nostris nostraeque fidei augendis incumbunt. Iamque ab alio rege, distante ab hoc quindecim itinere dierum, uocati patres sumptibus illius permagnificam fabricarunt ecclesiam. Immo et propediem pater superior missionis Tibetanae concessurus dicitur ad aliud magis remotum imperium, ab hoc 40 dierum itinere distans plus minusuê, uocatus itidem praecibus importunis ab rege. Residet is urbe tantae magnitudinis, ut octo dierum spatio uix circumiri possit, opulentia, magnificencia paucis secunda. Residet in ea supremus Lamma, ut uocant, respondet nostro romano pontifici. De eo hoc singulare et nouum accipe. Est in iurisdictione omnino supremus, eamque uicariis suis, qui dispersi per alia circumuicina regna sunt, communicat. Episcopis europaeis respondent hi uicarii, et minores illo, sed superiores omnibus aliis clericis et religiosis sui regni, quibus praesunt. Supremus Lamma coronam gestat in capite persimilem episcopali. Ferunt semel quotannis missam dicere, quibus cerimoniis, ignotum mihi. Certum est, pane et calice uti in ea. Sunt in hac urbe studia accademica more gentis, ubi prophanas et sacras praelegunt litteras, et supremus ille Lamma suos clericos et reügiosos absolutis studiis praeuiis disceptationibus doctoratus insigniis, qui id merentur, decorat et coronat. Reliqua, cum pater superior remeauerit, perscribam. Coeterum Tibetanae gentis instituta et mores annis superioribus me perscripsisse satis ad amussim memini, atque ideo hoc anno non repeto. Addo unum: regem hunc fratri suo, qui supremi Lammas in hoc regno (episcopo nostro respondet) uice fungit, inhibuisse et priuasse iurisdictione creandi nouos clericos, nouos Lammas seu religiosos eo duntaxat fine, ne sua multitudine officerent praedicationi fidei Christianae, licet publicarit se id facere praetextu necessitatis, qua urgeretur multi militis ad se tuendum ab hostibus uicinis. Et superfluam esse tantam clericorum et religiosorum multitudinem. Et hoc titulo plus quam tria millia eorum iussit arma sumere depositis clericalibus et religiosis insignibus. Missio Mogorensis aliquantum imminuta est regno bellis occupato, nimirum ubi arma strepunt, uacant silent consilia. In Japponia tres plus minusue e patribus nostris cum aliis multis uiui pro fide exusti sunt. Reliquis de missionibus, quia nondum naues appulere, nil perlatum noui est. Status Indiae saecularis est qui annis superioribus. Certe superiori anno die s. Thomae apostolo sacro duae Lusitanorum cymbae bellicae, cymbulas uerius dixeris, maiores, nauem Anglorum praegrandem ui aggressae et ingressae ipso in portu Surratensi, ferro igni omnia uastarunt, occisis plus octuaginta Ollandis et Anglis. Spolia, quae nostri reportarunt, feruntur aestimata sexaginta millibus florenorum. Et haec de India!