Szily János: Instructio venerabilis cleri dioecesis Sabariensis (Szombathely, 1855)
60 tern, nullum ante elapsum 48 horarum spatium, ab obitu computandum, sepeliri sinant. Ad praecavendam e contra haeredum molestiam, nullum post idem spatium a sepultura prohibeant; nisi cognati, aut aliae graves circumstantiae dilationem exegerint: verum elapsis 48 horis juxta ritum Ecclesiae cum hymnis, et orationibus funus catholicorum, et infantum acatholicorum in superpelliceo, et stola, adultorum vero acatholicorum absque his comitentur, atque nomina defunctorum cum designatione loci, et diei obitus libro mortuorum diligenter inscribant. CAPUT XIII. De Ordine. Tametsi Ordinis sacramentum non populum, sed Clericos spectet; nihilominus Parochi, et parochiarum Administratores eum informent: in Ecclesia Dei sicut verum sacrificium, ita verum sacerdotium a Christo Domino institutum, et Hierarchiám ex Episcopis, Presbyteris, et Ministris constantem existere. Trtd. Sess. 23. c. 1. et can. 6. de Sacr. Ordinis. Hujus dignitas, utilitas, et necessitas quanta sit, ex eo perspicuum evadit, quod alia sacramenta ab illo ita pendeant, ut sine eo partim confici, ministrarique nullo modo possint, partim solenni caeremonia, religiosoque ritu careant. Quam admirabilis itaque sit Sacerdotum excellentia, quam sublimis potestas, inde quisque colligat, quod Sacerdotes sint ministri, et internuncii Dei, qui divinam legem nomine ejus homines edoceant, ipsius Dei in terris personam gerant, et non solum Angeli, sed etiam Dii appellentur; Ps 8t. v. 6. Corpus, et sanguinem Christi conficiant, peccata solvant, vel retineant. Math. 18. v. 18. Quae utique dignitas, et potestas omnem humanam rationem superat, neque] aliquid ei simile in terris inveniri potest. Hinc admoneant suos, ut erga Sacerdotes, velut Patres suos, et Pastores spirituales, per quos salvari possunt, et debent, magna reverentia ferantur, eorum consiliis, et monitis obtemperent, atque in anima sua timeant Dominum, et Sacerdotes illius sanctificent; Eccli. 7. v. 31; memores, quod, qui Sacerdotes audit, Deum audiat, qui eos spernit, Deum spernat. Lucae 10. v. 16. Verum maximam sibi, totique Ordini clericali aestimationem, ac venerationem parabunt, si irreprehensibiles vitae suae exemplo populo praeluxerint. Idcirco iterum hortamur omnes, ut sollicite curent, se ipsos probabiles exhibere Deo, operarios inconfusibiles, recte tractantes verbum veritati* 2. Tim. 2. v. 16.
