Faut Márk és Klein Menyhért krónikája 1526-1616; C sorozat, 1. kötet - Sopron Város Történeti Forrásai (Sopron, 1995)
Die Chronik
hoch haltten thuet, Vnd wol aufgehebt solle werden. Dan wan Öedenburg damahl nicht den rukhen gehallten hette, < solle > so wären alle Märkht vnd Dörffer von hinnen biß auff Wien, Ja alle Vorstedte zu Wien Verbrannt vnd geplündert, vnd die leuth nidergehaut worden. Wollte Gott, Oesterreich bedächte diß gegen diser armen Stadt etc. (39 r ) Wie nun der feindt allso mit diser Stad ist vmbgangen vnd die Vorstedte verbrent hat, hat der Trautmanßdorffer Niemandt balld der Unsern burger zu seiner brandstadt <ei > hinauß gelaßen auß der Innern Stadt, sondern die Cossaken, die reutter vnd die Dornischen Muscatirer sein hinauß gefallen, was nicht verbrunnen ist, vnd der feind draußen vberlaßen hat, haben sie selbst gesuecht vnd geraubt, vnd vnser burger darüber bei den Thor, wanß hinauß haben wollen, sehr geschlagen vnd vmbgezukht. Darnach hat Trautmansdorffer begertt, man soll die weiber vnd khinder auß der festung thun, sie währen nichts Nutz allß zum außzehren. Item er hat begertt, wir sollen all vnser guet in 2 heuser zusammen Tragen vnd bringen, vnd Ihm den Schlüssel darzue geben, er wolle ein treuer Haußhallter sein, die Khinder wan wir sie Nicht werden wekh thuen, will er vber die Mauern in graben werffen. Daruber vil (39 v-40 v ) frauen auch khurz zuvor mit den Iren Nach Wien.verschikht vnd in die Newstad, daselbst hat man beschriben was sie mit gebracht, auch ihnen zu Wien aufferlegt, sie sollen sich mit den Iren auff 6 Monat mit profandt versehen <wonicht> oder ballt wekhweichen, wo nicht, so wolle man sie dem feind in die handt hinaußjagen, wan er khomen sollt fur Wien. Auch hat der Trautmanßdorffer <zu> von Öedenburg schir nichts wollen wekhfüren laßen allß weiber vnd khinder. Wie die Vorstedte alhie vber vnd vber gebrunnen (:welches in 3 stunden vollendet ward:) ist das feuer in die Stadt herein khomen vnd 3 oder 4 heuser in der Fleischakher gassen angezündet worden, aber durch Gottes hülff gelöscht worden. Die Stadtgraben hat man so Voll mit Wasser angelassen, das in den Eussern khraiß der Vestung oder Innenstadt die Weinkheller voller wasser gestanden sein, vnd die khleinern Vasser geschwumen. Auch <wie> hat man khurz zuvor (41 r ) alle schindel in der Innern Stadt von den Tächern muessen außschlagen, damit wan feur eingetroffen wurde, man es ballt löschen möchte. Vnd ist allenthalben wasser auff den böden zu sezen angeordnet worden. Es hat in der großen hitz ein solchen gstankh in der Stad von roß, Viech, Man, Weib, Khind, Cossakhen, Muscatirer, Reitter geben, daz viel verschmachtet vnd ballt darnach, sonderlich alte leith vnd khinder, gestorben sein. Die Stadgraben vnd gassen sein voller Ingewaid deß Viechs vnd anders Vnflats gewesen. In manchen Hauß sein vber 150 Menschen vbereinander gestekht. In den Zwingern hat man schir khein fueß recht von menschen khott etc. sezen khonnen vnd grausam in der hitz gestunkhen.
