Faut Márk és Klein Menyhért krónikája 1526-1616; C sorozat, 1. kötet - Sopron Város Történeti Forrásai (Sopron, 1995)
Die Chronik
Ir durchl(aucht) nun zum wekhraisen sich schikht, Stehet einer im ganzen landtß Versamblung auff, der Zaigte an, wie er von 2 oder 3 Spanschafften herauß wäre geschikht worden, Ire eusserste Noth den land vnd sonderlich Ir Durchl(aucht) für zu bringen, daß man mit Ihnen wegen der religion greulich (tsonderlich der Bellio Josa, Pez, Crausnekh vnd Wallonen vnd andere <vmbgeding> etc.:) Vmbgienge. Er aber Ir Nuncius sähe vnd spüre, daß sein höchsten bitten in Namen etlicher 1000 seelen nichts gellte, vil weniger er oder (29 v ) das landt ein ainigen beschaidt, wie man sie vertröstet hat, von Prag auß oder von Ir Durchl(aucht) wegen der gravaminum bekhämen theten, allso protestire er hiemit solenniter vor Gott vnd dem ganzen landt wo fern zu letzt wegen solcher grossen des Papstischen khriechsvolkhs, Wallonen vnd irer Obersten Tyrannei ein Empörung oder aufstandt entstehen wurde, das er vnd seine gspannschafften wollen entschuldigt sein, daß sie sich zur nothwehr haben < muesten > stellen muessen. Auff dise protestation schriren die Euangelischen Herrn vnd Standt alle, das auch diß ir ganzliche Maiming sei < da > dan patientia laesa fit furor. Darauff die Papstischen widerumb schriren, wurden die Luthrischen ein aufrur wider den khonig <g> anheben, so werde es gerochen werden, darüber sie von den Euangelischen sein außgelacht vnd ihnen betroet worden. NB. Vnd obgedachter Gravaminum halben ist Stephanus Botschkai von ganz (31 r ) ober Vngern vnd Sibenbürgen gehn Prag zum khaiser diß vnd ehgedachtes Jahr geschickht worden, dises alles muntlich Ir M(aies)t(ä)t anzuzaigen, aber der Wolff Unverzagt vnd Doctor Pez haben ihn nie fürgelaßen, hat auch den khaiser nicht sehen khönnen: sondern dise Räthe haben deß Wotschkai nuer gespottet, wan Ihm dieweil zu Prag zu lang wäre, wollten sie Ihm den Livium oder sonsten schöne buecher sich zu erlustigen schikhen: Darauff Botschkai zorniglich gantz vnuerrichter Sachen mit grossen verlangen diser länder Wider haimgezogen, zuvor aber zu Hoff vnd den gehaimen räthen in Prag starkh protestirt, welches darnach nicht allein dises land, sondern auch alle vmbligende länder biß auff dise Zeitten Mächtiglich verändert hat, vnd ist der Pfaffen hochmuet vnd Tyrannei auch in der Steirmarkh vnd Oesterreich gestürzt worden. (31 v ) 1604. NB. Umb dise Zeit ist h(err) Melchior Clein, so wie er von der Euangelischen Predigt heim gefahren, von Creutz auß durch des Pischoffs hussarn gefangen worden vnd etliche frauen auff Croispach gefankhlich gefürth worden etlich Tag dorn
