Faut Márk és Klein Menyhért krónikája 1526-1616; C sorozat, 1. kötet - Sopron Város Történeti Forrásai (Sopron, 1995)
Die Chronik
selbst binden lassen, eh wan er in ir begeren willigen wollte: Auff diß hat die Gmain das Feurerische hauß vmbringt, vnd gar vil den praedicanten gewarnet, er sollte nicht erscheinen. Der Rath aber Ihn etlich mahl vermanet, er sollte erscheinen, sie wollten alle darob sein, daß Ihme gar khein laid widerfahren sollte. Darauff der Praedicant letzlich erschinen vnd vil gefragt vnd auß gehöret ist worden vnd weill die Verfolger gesehen, daz ein aufrur entstehen, vnd sie darüber in gefahr möchten khomen, haben sie letzlich im Namen Ir M(aies)t(e)t Ihm aufferlegt, er soll innerhalb 8 tagen die Stadt räumen bei Vermeidung höchster straff. Darauff obgedachte burger so lang zu Wien in arest behalten, biß er hinwekh verraiset ist. (18 r ) Diß 1595 sein etlich hundertt Italianer vndter Mario Farnesio irem Obersten im Herbst an einer erschrökhlichen khrankheit, vnd vil vnser burger alhie auch daran gestorben. A(nn)o 1595 <1597> Nota hic der Mörwiscber aufrur wider Öedenburg. (18 v ) Mit denen aufrurischen Pauren deß Dorffes Merwisch zu diser Stad Öedenburg gehörig, Verhellt es sich allso. Es ist Marx Fauth vnd Gregor Arnoldt Rathsverwantte von einem Ehrsamen Rath gehn Preßburg auff den Landtag verordnet worden, vnd Im wehrenden landtag verliset < vns > der Registrator den ehgemelten abgesanten in der Still einen brieff Ihme registratori vom Georgen Seyfridt von Kholonitsch freiherrn, Hauptman zur Eisenstadt, zuegeschikht, in welchem brieff stunde, daß er registrator vleissig Nachsuechen soll in den Archiuis bei der vngrischen Camer Canzelei, wie vnd was gestallt daz dorff Merwisch vor zeitten an die Stat Öedenburg khomen sei. Er, registrator sollte für seine Müeh etwas Stadlichs bekhomen, wan er was gwisses deswegen finden würde, deßgleichen hette er auch an alle Canzleien zu Hoffe, zu Wien angelangt vndt noch. Dan die Merwischer hetten Ihn Hauptman gar offt haimlich gebeten daß er sie von der Stadt Odenburg (:die Ihnen vil laides anthäten:) wollte frey machen. (19 r ) Sie wären Nuer Pfandtschilling zur Stadt Öedenburg. Wie man nun fast alle Canzleien zu hoff außsuechte, funde man doch destwegen Nichts. Vnd haben die Merwischer deßtwegen auß antrib des Hauptmans gar vil mit raisen vnd geschenkhen Verzehrt, aber nichts außgericht. Vndterdessen, da obgedachte abgesantte diß einen Ehrsamen Rath enttekht haben, Ist herr Bürgermaister mit etlichen rathsverwantten vnd burgern gehn Merwisch hinauß, hat sie vberfallen, in iren briefen Nachgesuecht: sein darnach gefenkhlich eingezogen, vnd ist von Preßburg vnd Tirnaw vnd den 3 Comitatibus oder gespannschafften ein recht, auff begern eines raths alhie, ersetzt worden, welche Vnparteische Richter Nach ankhlag vnd veranttworttungs Verhörung
