Faut Márk és Klein Menyhért krónikája 1526-1616; C sorozat, 1. kötet - Sopron Város Történeti Forrásai (Sopron, 1995)
Die Chronik
Auff der vbermaß oder bei den Steinen Prükhl hat man vil fueder Pinis vnd Schmölen gemäet vnd haimgefürt, sonderlich die gastgeben, Sartori etc. NB. Dises 1616. Jahr auch ein Meusjahr, da vnzelich vil Meuse in weingartten vnd Akhern sich sehen laßen. Auch gar vil Stahren die Augster zu Weingarten gar außgefressen. Dise zwei Jahr sein Bau Jahr, dan schier iederman, der gellt hat gehabt, hat müeßen anfangen <zu> heuser zu bauen, Maistes thails auß vbermueth, Trotz. NB. Die Preßburger haimlich auff vnsern dörffern vnd bei H(errn) Treissiger vnd anderst[w]o nachgefragt, wo her wir sovil wein bauen vnd verkhauffen, es gieng nicht recht mit vnß zue, wir brauchten allerlei practiken vndter dem schein vnser freiheiten: gehn also die Preßburger vmb, wie sie vnß vmb vnser weinfur gehn Preßburg mochten bringen. (90 r ) Darüber H(err) Matthias Cramer vnd herr Melchior S. Bartholom gehn Preßburg zum h(errn) Personali abgesandt, sich aldort wegen diser Stadt vnschuldt beschwart, das die Preßburger mit solchen Tükhen vnd Neidt wider vnß vnbefüegterweise vmbgiengen etc. Den 7. Septembris A(nn)o 1616. hat ein Ehr(samer) rath mit der gmain betracht, eine Maur vmb alle Vorstedt zu machen; gemaine Stadt soils thuen, vnd soll ein Jeder vorstadtler vnd die Mairhoff haben von einen Jeden Taller, den er zur stewr gibt, Noch einen Schilling Pfenning geben, zu ersparung der Wälder, dan gwaltig vil Holtz alle Tritte Jahr auff die Hauptzaun gangen ist. Item diß Jahr in Nouembri zwaimal mit steinen in des H(errn) Burgermaisters Stubenfenster, wo er alzeit isset, bei der Nacht geworffen worden. (90 v )
