Bírósági Könyv 1423-1531; A sorozat, 2. kötet - Sopron Város Történeti Forrásai (Sopron, 2005)

Das Gerichtsbuch-A bírósági könyv (Jenő Házi - János Németh)

Item auch sol kein sneiderknecht, czehenn mit einer freyen tochter, nach vrtenn zw trinckenn geben, nach zw frumen lewtten an den tancz füeren, nach mit ir redenn auff der gassenn, vor frumen lewtten Welicher das nicht tat der ist verfallenn ein virdung wachs Item wer der war in vnnserer zech, es sei knecht ader knab, der do meister vnd knecht gegen einander verlug, ader frawn vnd diren, welicher des vber weist wirt der ist verfallenn, ein halb phunt wachs, vnd in der meister vnd knecht pesserung Item auch wer der wer, der einen meister ader ein knecht das sein wegtrueg, welicherlai das war, das doch vnerberlich war, dem welenn vnd sullenn im nachschreiben, wo er ist, das er vnnserm hanntwerch nymmer gar genueg sey, Item war der war inn vnserer zech, die vrtten bei frumen lewten, in der pad stueb nicht bezalet, der ist verfallenn ein phuntt wachs, Item welicher der wer in vnserer zech, der sich vber weinet da von im ein vnuernufft widerfüer, bey frumen lewttenn, der war verfallenn ein virdung wachs Item welicher sneiderknecht zertt bey dem vatter, es sey vil ader wenig, vnd im das vber sein willenn wegtrueg, dem well wir auch nach schreibenn vnd wo er in einer stat begriffenn wirtt, do ein czech ist, do sol er gepust werdenn vmb ein halb phunt wachs Item auch mag ein jeder knab, zw den gesellenn an die vrtten, siezen vnd nach dem pad nicht feyeren, ab er ader auswendig war, in einer anderen vrtten, an der knecht wissen, welicher knab das tatt, der ist verfallenn ein virdung wachs vnd in der kriecht pesserung, [144] Item auch ist zw merckenn, die gewonlichenn ambt die wir lassenn singenn item zw der lichtmes ein frolich ambt vnd zw aller seil tag ein sei ambt, item an allenn quottember suntag ein selambt, vnd wer das, ambtpts apher versawmpt, an gros nott, der ist verfallenn ein virdung wachs, es sei meister ader knecht, Item wan ein sneiderknechtt, kranck wurd, so sol derselbig meister do er pey ligt den altten kriecht vnd ein and(e)rn knecht zw inn nemen, vnd sollen mit im reden, ab er ettwes vbrigs hiett, das er dasselbig zw der zech verschüff, vnd welicher das nicht tatt der ist verfallenn ein virdung wachs, Item wan ein sneiderknecht stürb, ader ein knab, so söllenn all meister, vnnd meisterin vnd auch auch all knecht komen, in das selbenn meisters haws, da er in ligt, vnd mit im genn kirchenn geen, desgeleichenn wann ein meister ader ein meisterin stirbt, vnd welicher den mitgang vnd das opher versawmpt, der ist verfallenn ein virdung wachs, Item des nachstenn feiertags, darnach als derselbig bestätt ist wordenn, so sol man im ein selambt lassenn singen, aus der zech daselbst, vnd auch sollenn sie all gen opher geen bei einem firdung wachs, Item ist awer einer so gar arm, das er nichtz hatt, so sol man im des ersten ein ambt lassen singen aus der zech, Item wer des czusamsüger bedarff, der sol im zwen phennig gebenn Item wer der war, in vnnserer zech, der der vorgeschribenn artikll vberträt, ader vber füer wo das einer von dem annderenn wüst, vnd nicht meldet, der ist geleich in den selben puntten, als der ander,