Dominkovits Péter: Második telekkönyv 1554-1580 (Sopron, 2015)
A telekkönyv
wegen rechter nutz gwör vnnd scherm gegen meniglich. Actum den 23 tag Marty im [15]75ist[en] Sub magistratibus Jacobo Müettlero consule et Joanne Stainero judice. 343. (II.-205.) Der fuersichtig ersame weise herr Hannß Gering vnnd Rosina sein eheliche hausfraw, haben nutz vnnd gwör emphangen wegen eines oeden gemeur vnnd müllschlag, vor dem Schripperthor gelegen, welcher noch in dem siben vndtreissigisten jar auff bitt vnnd anlangen Blasy custodis Steffan guardian vnd anderer brueder des conuents allhie, Paullen Schützner burger allhie Anna seiner ehelichen hausfrawen bede seilligen vnnd jerer beder erben vmb neunundtzwaintzig phunt, so an das clostergebew angelegt, verkhaufft worden. An jetzo aber wollermelldenn herren Hansen Gering seiner hausfrawen vnd erben von einem ersamen wollweisen raht allhie, wegen seiner gehabten velltigen diensten, deren er sich noch die zeitt seines lebens willig anbeütt frey ledig sambt dem wasser so aus dem Stadtgraben auff ermelldten müllschlag rint, geschenckht worden, will auch ermellder burgermaister richter vnnd raht, desswegen, anfangs benenter conleütt vnnd erben rechte trewe gewöhr scherm vnnd füerstanndt sein, fuer all rechtlich khrieg vnnd einfäll, so offt es nott beschiecht gegen meniglich. Actum 23 Marty im [15]75ist[en] jar Sub magistratibus Jacobo Müettlero consule et Joanne Stainero judice. 344. (II.-205.) Der fuersichtig ersam weise herr Jacob Müettler burgermaister vnd Lucia sein eheliche hausfraw, haben nutz vnnd gwör emphangen wegen eines mülschlags allhie bey den Khrautäckhern gelegen, welcher jnen von einem ersamen raht vnnd gemain an S[ankt] Marx tag des [15]74ist[en] jares laut darüber gegebenes vnd fuergebrachtes verfertigtes Scheins, wegen seiner mühe vnnd vleiß bewilliget, doch das er entgegen ettwas namhafftes vnnd der jugent nützliches in die schuell stifften solle, welches auch bestehen, dann auch wegen eines khleinen zippfl wisen, so dem teüchtmaister Georgen Khraneigl seylligen bewilliget gewest, vnd eines khleinen wißfleckhl bey dem zieglstadl gelegen, welches gemainer stadt nichts nutz, sond[er] jarlich abgehallten wierdt, vnd jnen beden conleüten derhalben auf jer anhallten nach besichtigung vergünstiget [!] worden, sein derhalben obbemelldter zwayer wisfleckhl halben eu[er] gantzer ersamer raht vnd gemain obbenentes h[errn] burg[er]maisters vnd seiner hausfrawen rechter nutz gwör vnd scherm geg[en] meniglich. Betreff[end]d[e]n mühlschlag ist d[er] selb auch bewilliget doch do ettwo stritt derweg[en] furafüelle [!] das derselb auff jeren d[er] conleüt consten richtig gemacht werde. Actum 15 Aprillis im [15]75ist[en] jar Sub magistratib[us] Jacobo Müetlero consule et Joanne Stainero judice. 115
