Circulares literae dioecesanae anno 1906 ad clerum archidioecesis strigoniensis a Claudio Francisco Cardinale Vaszary principe primate regni Hungariae et archiepiscopo dimissae
VI.
Venerabiles Fratres! Nr. 1298. Eminentissimus Archipraesul dignatus est die 15. Martii huius tenoris literas ad me dirigere: „Licet pristinae sanitati haud restitutus sim et debilitatem corporis nimis adhuc persentiscam, premit tamen me gratitudinis officium, quo erga Illustritatem Vestram devinctus sum ob preces pro me graviter nuper aegrotante per archidioe- cesim indictas. Multam sane mihi attulit consolationem haec fraternae benevolentiae ac filialis pietatis attestatio. Magno mihi praesidio fuere in periculo, quo versabar, piae orationes ad Patrem Misericordiarum, Deum totius consolationis, pro salute mea fusae. Intimas igitur ago gratias tam Illus- tritati Vestrae, quam dilectissimis in Christo fratribus ac filiis pro tanta in me ostensa charitate. Strigonii, die 22. Martii 1906. Deum precor Omnipotentem, ut super omnes, quos mihi fratres ac filios carissimos dedit, ostendat in bonitate abundantes divitias gratiae suae.“ Benignissimus Archipraesul, uti ex adducto gratioso rescripto conspicere licet, sanitati pristinae nondum est restitutus, ast imminens periculum omnipotentis Dei miseratio avertit. Justum igitur est, ut pro tanto beneficio intimas Deo agamus gratias et quamvis preces publicae indictae et oratio pro infirmo Archipraesule imperata non amplius sint obligatoriae, non desistamus tamen una cum fideli populo ulterius quoque Deum deprecari, ut Suam Eminentiam, benignissimum Archipraesulem nostrum integrae saluti restituere dignetur. Dr. Ludovicus Raj ner m. p. Vicarius Generalis.
